AFGANISTAN– Dëshmitarët okularë që i mbijetuan sulmit të së enjtes, thanë se jo të gjithë ata që vdiqën atë ditë ishin vrarë nga sulmuesi vetëvrasës.
Mohammad, një shofer taksie nga Londra, kishte udhëtuar për në Kabul për të ndihmuar familjen e tij të siguronte kalimin e sigurt nga kryeqyteti afgan. Ai dhe gruaja e tij u vranë në shpërthimin jashtë Portës Abbey të aeroportit, ndërsa dy nga fëmijët e tyre mbeten të zhdukur.
Vëllai i tij dhe të tjerët të intervistuar nga korrespondenti i BBC në Kabul thanë se familja dhe të afërmit e tyre nuk u vranë në shpërthim, por nga të shtënat me armë në “konfuzionin” që rezultoi. Vëllai i Mohammad tha se të shtënat erdhën nga drejtimi ku ishin vendosur ushtarët amerikanë që ruanin perimetrin e aeroportit.
Bombardimi i së enjtes erdhi vetëm disa ditë para afatit të SHBA për të lënë Afganistanin më 31 gusht. Shteti Islamik (IS, ISIS, ISIL ose Daesh) mori përgjegjësinë për sulmin, i cili la 13 anëtarë të shërbimit amerikan të vdekur dhe më shumë se një duzinë të tjerë të plagosur.
Të Premten, Sekretari i Jashtëm i Mbretërisë së Bashkuar, Dominic Raab tha se dy shtetas britanikë dhe një fëmijë i një shtetasi tjetër britanik u vranë në sulmin vetëvrasës. Fillimisht besohej se sulmi përfshinte një shpërthim të dytë në Hotelin Baron aty pranë, por Pentagoni më vonë sqaroi se kishte vetëm një shpërthim.
