Pas dy vitesh mungesë për shkak të pandemisë, mesi i nëntorit rikthen në kryeqytet Panairin e Librit. Ky panair, nisi dje (17 nëntor) pranë Pallatit të Koncerteve dhe do të zgjasë deri ditën e dielë (21 nëntor).
Për 5 ditë me radhë, mbi 90 shtëpi botuese do të prezantojnë titujt e rinj të librave dhe siç e do tradita vizitorët do të kenë mundësi të takohen me vetë shkrimtarët për të shkëmbyer biseda apo shënime në librat e zgjedhur.
Njësoj si në panairet e mëparshëm, vihet re se titujt e huaj janë më të shumtë se letërsia shqipe, e ndërsa ditën e shtunë pritet të bëhet ndarja e çmimeve për krijimin më të mirë, përkthimin më të mirë, autori më i mirë për fëmijë, lexuesi më i mirë, etj.
Përsa i përket masave kundër Covid-19, duke marrë parasysh interesin e madh që tregojnë njerëzit në lidhje me këtë event, ndryshe nga herët e tjera nuk do të lejohen grumbullimet e mëdha apo vizitorë që shfaqen pa maska.
Gjithsesi, sipas organizatorëve, vërtetimi i vaksinës apo testit negativ nuk janë të detyrueshme.
Kujtojmë se vjet, Panairi i 23-të i Librit, “Tirana 2020” u zhvillua online ku përgjatë datave 12-15 nëntor, shoqata e Botuesve Shqiptarë listoi një sërë aktivitetesh virtuale e ndërsa diskutimet mbi librin u shfaqen në disa projektorë, të vendosur në pikat kryesore të kryeqytetit.
