Dinamo luan sot një ndeshje jetë a vdekje për mbijetesën, pasi në ‘Elbasan Arena’ do të presë Kastriotin, që renditet në vendin e tetë me 31 pikë, 8 më shumë se ‘nëndetësja’ dhe që në fund të sezonin bën ‘play-off’ për të qëndruar.
Klubi kryeqytetas, që u ngjit në Superligë pas 9 vitesh, ka për detyrë vetëm fitoren në rast se nuk dëshiron të kthehet andej nga erdhi. Mirëpo situata nuk është optimiste duke parë faktin që në 3 ndeshjet e fundit në kampionat kanë vetëm humbje, ndërsa Kastrioti ka 4 fitore në 5 ndeshjet e fundit.
Nga ana tjetër edhe krutanët synojnë të paktën të mos humbin, pasi janë me pikë të barabarta me Egnatian e vendit të shtatë dhe duan të shmangin ‘play-off’ e daljes nga kategoria. Në favorin e Kastriotit për këtë ndeshje janë edhe atmosfera jo e mirë te Dinamo për shkak të përplasjeve brenda klubit.
Sfida në ‘Elbasan Arena’ do të nisë në orën 14:45.
