SHKODËR– Një ditë pas atentatit ndaj policit të Shqiponjave në Shkodër, është zbardhur sot skema e plotë, arsyet e para, dhe identiteti i autorëve. Albert Pjetri, nuk do ishte terrozizuar familjarisht mbrëmjen e djeshme, ndërsa disa netë më parë nuk do të kishte ndaluar “njeriun e gabuar”.
Dëshmia e tij në komisariatin e Shkodrës, pas breshërisë së plumbave në lokal, zbuluan konfliktin me një emër të njohur për Shkodrën. Ai është Bardhok Pllanaj, i njohur si kumbari. Një natë, efektivi i ka bërë shenjë për të ndaluar, por ky i fundit ka bërë rezistencë. Policia e ka ndjekur dhe më pas e ka ndaluar duke e shoqëruar bashkë me mjetin në drejtorinë e Policisë në Shkodër, ku është bërë edhe sekuestrimi i makinës. Dhe këtu duket se “kumbari nuk e ka falur”.
Burime për Dosja.al bëjnë me dije se Bardhok Pllanaj mblodhi grupin e tij dhe bashkë me Rivaldo Pllanaj, Orlando Pllanaj dhe Mirsad Shpellzaj kanë organizuar sulmin me armë zjarri në lokalin që menaxhohet nga vëllezërit e Pjetrit.
Të katër autorët janë shpallur në kërkim ndërsa deri më tani nuk ka asnjë pistë tjetër për hetimin e ngjarjes. Edhe vëllai i tij, Vlash Pjetri, i cili ka qenë dhe administrator i Njësisë Rrethinat, pretendon se asnjë prej vëllezërve nuk ka probleme me konflikte me njëri, por sërish nuk përmend asnjë emër, tek i cili dyshon lidhur me ngjarjen.
Sulmi me armë zjarri ndaj lokalit ka ndodhur mbrëmjen e djeshme rreth orës 21:10, në fshatin Dobraç. Për fat të mirë nga atentati nuk ka patur viktima dhe as të plagosur.
Kush është Bardhok Planaj
46-vjeçari Bardhok Planaj cilësohet si “Kumbari” i Shkodrës. Dy vite më parë policia dhe prokuroria i sekuestroi një pallat me vlerë 2 mln euro, ndërsa u vu nën akuzë për tre vepra penale “Pastrim parash”, “Falsifikim dokumentesh” dhe “Ndërtim pa leje”.
Sakaq, në vitin 2014, i forti i Shkodrësë është arrestuar për trafik droge. Bardhok Pllanaj njihet si njeriu që trazoi politikën dhe policinë disa vite më parë. Në vitin 2014, “Kumbari” i Shkodrës u fsheh në makinën e ish-deputetit Mark Frroku, për t’iu shmangur arrestimit nga policia, e cila e kërkonte për trafik droge. Frroku mohoi akuzat në drejtim të tij, por në raportin e oficerëve të gjurmimit në sektorin e narkotrafikut, shkruhet se i dyshuari në suervejim prej tyre ka lëvizur nga lokal “Antika” në Tiranë, drejt Laprakës me automjetin “Audi” në pronësi të deputetit.
Planaj është hetuar së bashku me disa persona të tjerë, si pjesë e grupit të të arrestuarve në kuadër të operacionit “Laguna e Vilunit”, madje ndaj tij u nxor edhe një urdhër arresti, por në atë kohë ai nuk u gjet. Ai i shpëtoi dënimit për mungesë të provave.
Gjatë operacionit “Laguna e Vilunit” të zhvilluar më datë 30 shtator 2014, në vendin e quajtur “Rana e Hedhun” midis Lagunës së Vilunit dhe Shëngjinit, shërbimet e policisë kufitare dhe ato të Guardia di Finanza, panë të hidheshin nga një mjet lundrues, në det çanta të zeza në përmasa të mëdha.
Pasi u nxorën nga deti, rrezultoi se brenda thasëve kishte drogë me peshë 210 kg. Të nesërmen, në vendin e quajtur Grykëderdhja e Bunës në Velipojë, forcat e policisë kufitare gjetën të hedhura në det edhe 15 çanta të tjera me peshë 594 kg. Hetimet provuan se sasia e lëndës narkotike ishte ngarkuar në skaf në Velipojë për t’u dërguar në Itali, te pritësit e saj, njëri prej të cilëve është identifikuar si shtetas italian.
