Dorëheqja e ministrit në detyrë për Europën dhe Punët e Jashtme, Gent Cakaj dhe emërimi nga kryeministri Edi Rama i disa ministrave të rinj, ishte lajmi i ditës sot në vend.
Por për presidentin e Republikës Ilir Meta kemi të bëjmë vetëm me largimin nga detyra të një zv.ministri dhe për emërimin e ministres së re, në këtë rast, Olta Xhaçka, duhet zhdekretimi i ministrit të jashtëm që është kryeministri Edi Rama.
“Për rastin konkret, kemi të bëjmë me një zv.ministër, i cili ka dhënë dorëheqjen dhe nuk ka lidhje me ministren e jashtme në rastin konkret. Duhet të vijë kërkesa për zhdekretimin e ministrit të Jashtëm Edi Rama, i cili është ministër i jashtëm dhe emërimi i ministres së re është i lidhur me zhdekretimin e tij si ministër i Jashtëm. Nuk ka lidhje me detyrën e zv/ministrit. Ai është një akt vullnetar”, u shpreh Presidenti Meta në Tv Ora.
Kreu i Shtetit tha se nuk ka marrë ende propozimet nga ana e qeverisë për dy ministrat e rinj.
Duke u ndalur tek emërimet në Gjykatën Kushtetuese, Presidenti tha se ligji nuk është respektuar në mënyrë strikte.
“Asnjëherë. Sa i takon ndonjë ligji është e diskutueshme sepse keni rastin e Gjykatës Kushtetuese të konfliktit që vajti në Venecia. Por është e sigurt se Kushtetutën, Presidenti nuk e shkeli se ky ishte dhe thelbi i konfliktit sepse në Kushtetutë është e përcaktuar radha e emërimeve në Gjykatën Kushtetuese, President-Parlament-Gjykatë e Lartë. Thelbi i konfliktit dhe provokimi ishte që Presidenti të shkelte këtë radhë, prandaj KED nuk i sillte Presidentit emërimin që duhet t’ja sillte në kohë. Në rast se ligjet do të ishin respektuar në mënyrë strikte disa betime të anëtarëve të Gjykatës Kushtetuese nuk duheshin pranuar.
Në rast se mund të ketë ndonjë shkelje që do ta konsideroja në nivel të ligjit për Gjykatën Kushtetuese kjo ka ndodhur për arsye praktike dhe jo për vullnetin e Presidentit për ta bërë këtë, ajo që Presidentit nuk i lejohet është shkelja e Kushtetutës dhe Presidenti nuk e ka shkelur. Ju i dini përpjekjet e mia për më shumë se tre vite që mos mbetej Shqipëria pa Gjykatë Kushtetuese. Kemi qenë në këtë situatë, ose të respektoheshin strikt kërkesat e ligjit dhe të spostohej ky proces edhe për një vit tjetër… Nuk e kam parë si ndeshje me askënd por përpjekje për të luftuar dhe frenuar kapjen e plotë të shtetit dhe si kontribut për vendosjen e rendit kushtetues në vend i cili është tronditur seriozisht”– tha ai.
