TIRANË– Përparim Ademi, 59-vjeçari që ekzekutoi dy motrat Zhaneta Metani dhe Kristina Bardhi në vigjilje të vitit të Ri është lënë në burg nga Gjykata e Tiranës. Ademi u shfaq i qetë në sallën e gjyqit duke pranuar krimin, ndërsa trupa gjykuese dha masën e sigurisë. Ademi u shfaq pa maskë, duke mos i kushtuar rëndësi shëndetit nga rreziku i Covid.
Gjatë seancës gjyqësore, avokati i tij, Arben Gramo, mbrojti Ademin duke thënë se gjendja e tij psikologjike është e rënduar dhe se klienti i tij është penduar. Por Prokurori Albert Demirneli nuk është bindur duke ndryshuar edhe klasifikimin e veprës penale për ngjarjene 31 dhjetorit të 2020. Ai akuzohet tashmë jo më për “vrasje në rrethana cilësuese”, por për “Vrasje për shkak të marrëdhënieve familjare”.
A ishin dy gratë njëherazi edhe motra në lidhje me 59-vjeçarin?
Pretendimi i autorit në dëshminë e tij në Polici, se ishte në lidhje dashurie me të dyja motrat, dhe se fillimisht ishte njohur me Kristinën e më pas me Zhanetën, është mbështetur dhe nga e shoqja. Fillimisht raporti intim i tij ka nisur me Kristinën shumë vite më parë, ndërsa pasi është ndarë me të, ai është lidhur me motrën tjetër, Zhanetën. Gruaja e Ademit, në dëshminë e saj para Policisë është shprehur se ka qenë në dijeni të tradhtisë nga i shoqi, por për të ruajtur martesën ka heshtur dhe i ka bërë mikesha, dy motrat e vrara tashëm prej tij.
Një tjetër detaj i zbuluar në gjykatë, para gjyqtarit Gend Hoxha është pretendimi i autorit se ka një fëmijë me njërën nga viktimat, por që nuk e ka regjistruar në emrin e tij.
Por si ndodhi vrasja?
Dinamika e vrasjes është zbardhur nga rrëfimi i autorit, marrja në pyetje e fëmijëve dhe dëshmitarëve pranë pallatit ku jetonin dy viktimat. Përparim Ademi kishte shkëputur marrëdhëniet prej disa muajsh me të dyja motrat. Ai dyshonte se Zhaneta, motra me të cilën ishte së fundmi në lidhje intime, kishte nisur një raport të ri. Nga xhelozia, ai është nisur drejt pallatit dhe në shesh-pushim ka gjetur një nga fëmijët e Zhanetës. Me një armë tip kallashnikov, model kinez, ai ka përdorur fëmijën si karrem dhe ka shkuar në apartament. Në këtë moment, dy gratë ishin duke ngrënë buke. Sapo e kanë parë që ka hyrë, janë ngritur për të mbyllur derën, por ishte tepër vonë. Në këtë moment, autori ka zbrazur karikatorin mbi to dhe muret e banesës dhe është larguar. Tashmë mbi të rëndon akuza e vrasjes për shkaqe familjare dhe ndodhet në burg.
