Një burrë i cili u përfshi në një rrjet të trafikut të njerëzve që rezultoi në vdekjen e 39 migrantëve në një kontejner kamionësh është dënuar nga drejtësia britanike.
Shtetasit vietnamezë, të moshës midis 15 dhe 44 vjeç, u mbytën në kamion frigoriferik gjatë rrugës nga Zeebrugge në Belgjikë për në Purfleet në Essex të Britanisë në tetor 2019.
Gjykata e Old Bailey burgosi për 10 muaj, shqiptarin Gazmir Nuzi, 43 vjeç, banues në Tottenham, në veri të Londrës, shkruan BBC. Vitin e kaluar, ai e pranoi akuzën për lehtësimin e imigracionit të paligjshëm.
Babai i tre fëmijëve e kishte pranuar rolin e tij të kufizuar në kontrabandë, por mohoi të ishte anëtar i grupit të krimit të organizuar pas udhëtimeve të shumta nga kontinenti që datojnë nga maji i vitit 2018.
Në Gjykatë u tha se shtetasi shqiptar mori nipin e tij dhe një burrë tjetër pasi ata ishin kontrabanduar në Britani në pjesën e pasme të një kamioni më 11 tetor 2019.
Pak më pak se dy javë më vonë, 39 personat vdiqën ndërsa ndoqën të njëjtën rrugë, pasi kishin qenë në kontejner për të paktën 12 orë.
Prokuroria pranoi që Nuzi nuk ishte anëtar i grupit të krimit të organizuar pas operacionit të kontrabandës.
Nuzi ka kaluar muaj në paraburgim dhe gjykatës tha se ai duhej të lirohej për shkak të kryerjes së dënimit. Shtatë burra të tjerë ende nuk janë dënuar për përfshirjen e tyre në rrjetin e kontrabandës.
