Departamenti Amerikan i Mbrojtjes ka uruar Ministren për Evropën dhe Punët e Jashtme Olta Xhaçka për detyrën e re, ndërsa vlerësoi rolin e saj në 3 vite si Ministre e Mbrojtjes.
Ndër të tjera në mesazh thuhet se Shqipëria shërben si lider në rajon, përmes Kryesisë së kartës SHBA-Adriatike, apo siç njihet ndryshe A5.
“E nderuar zonja Ministre
Në emër të Departamentit Amerikan të Mbrojtjes, ne vlerësojmë thellësisht mbështetjen tuaj të palëkundur në marrëdhëniet e mbrojtjes SHBA-Shqipëri në më shumë se tre vjet si Ministre e Mbrojtjes. Lidershipi juaj ka bërë të mundur përparime thelbësore në modernizimin e Forcave të Armatosura shqiptare. Ju keni udhëhequr me aftësi institucionin tuaj përmes sfidave të papritura – nga tërmeti te COVID-19 – ndërsa shërbeni si një lider në rajon, përmes Kryesisë së Kartës SHBA-Adriatike”, thuhet në mesazhin e Zyrës së Ndihmës-Sekretarit të Mbrojtjes.
“Ne e vlerësojmë thellësisht angazhimin tuaj të qëndrueshëm dhe shembullor për të avancuar shërbimin e Forcave të Armatosura Shqiptare krah për krah me SHBA-të dhe aleatët e NATO-s në operacionet e koalicionit, të tilla si Misioni ‘Mbështetja e Vendosur’ në Afganistan. Departamenti i Mbrojtjes i SHBA ju uron fatin më të mirë në pozicionin tuaj të ri“, vijon mesazhi.
