Masat kufizuese në Shqipëri do të hiqen përfundimisht vetëm kur të bëhet e mundur arritja e imunitetit të tufësmbi 70%. Lajmin e ka bërë me dije vetë shefi i Urgjencës Kombëtare, Skënder Brataj.
Në një intervistë në Report Tv, Brataj është shprehur se ende duhet pasur shumë kujdes pasi moshat e reja mbajnë akoma “rekord” për trasmentimin e pandemisë. Duke shtuar se efektin e vërtetë të festave të fundvitit tek pandemia do ta shohim në fund të janarit.
“Përfundimisht do të hiqet vetëm kur do të bëhet imunizimi i tufës, pra 60-70%. Duhet pasur shumë kujdes. Adoleshenca e merr në qafë familjen. Po shohim situatën në Korçë që ishte tipike e grumbullimit të Tiranës në festat e fundviti dhe tamam do ta shohim në fund të janarit. Edhe universitetet nuk duhet të hapen. Mbajtja e maskës patjetër e jep efektin e vet pasi nuk po na mbërrin gripi akoma. Fundi i pandemisë nuk është i lidhur me vendin tonë por me të gjithë botën. Vaksina vërtet është fillimi i fundit të pandemisë por sa ka filluar. Do të durojmë edhe disa muaj të tjerë,“- tha Brataj.
Ditën e sotme, sipas Ministrisë së Shëndetësisë, janë shënuar 5 viktima dhe 656 raste të reja në 24 orët e fundit.
