Vlorë- Autorët e atentatit të ndodhur mbrëmjen e së shtunës në qytetin bregdetar ku humbi jetën 40-vjeçari, Gentian Qarri vijojnë të mbeten enigmë.
Ngjarja ndodhi kur 40- vjeçari, sapo doli nga banesa e tij, që ndodhet në lagjen “29 Nëntori”, ndërsa autorët sipas Policisë, dyshohet se kanë qenë dy persona të kamufluar, të cilët kanë qëlluar me plot 20 plumba në drejtim të Qarrit, nga një armë automatik, tip “Sharrs”, armë e cila lë një zhurmë të mbytur.
Vetëm pak minuta pas ngjarjes së rëndë, një automjet tip “Toyota Yaris”, me targa greke u gjet e djegur në zonën e “Pyllit të Sodës”. Në brendësi të automjetit u gjet edhe arma e krimit, që sipas Policisë është përdorur nga autorët në atentat. Policia e Vlorës ka nisur hetimet për këtë ngjarje të rëndë, ndërsa janë mësuar të tjera detaje rreth atentatit të së shtunës në Vlorë.
Grupi hetimor i ngritur në Policinë e Vlorës për zbardhjen e kësaj ngjarjeje të rëndë, kanë shoqëruar gjatë ditës së djeshme 15 persona, kryesisht dëshmitarë që ishin në vendin e ngjarjes, por edhe familjarë të viktimës. Nga shoqërimi i tyre, Policia synon të arrijë të marrë një informacion më të detajuar rreth lëvizjes së automjetit të autorëve, apo dhe të momentit të ngjarjes.
Sipas burimeve nga Policia, Qarri është qëlluar plot 20 herë me breshëri, nga të cilat, 12 plumba e kanë prekur në trup, në pjesën e kraharorit dhe brinjë. Ndërsa një pjesë e plumbave e kanë prekur edhe në gjymtyrët e poshtme. 40-vjeçari shkoi i plagosur rëndë në spital, por për shkak të plagëve të rënda humbi jetën.
Dyshohet se të dy autorët të jenë ndihmuar nga persona të tjerë në momentin kur i kanë vënë flakën automjetit dhe armës së krimit në zonën e “Pyllit të Sodës”, për t’u larguar prej andej me një tjetër automjet. Pista kryesore ku Policia po heton për zbardhjen e kësaj ngjarjeje mbetet ajo që lidhet me dënimin e 40- vjeçarit Qarri në Itali. Ai ishte dënuar me 11 vjet burg për trafik të lëndëve narkotike në shtetin italian dhe pas dënimit, ishte kthyer në Vlorë.
