DURRËS– Ambasadorja e Shteteve të Bashkuara të Amerikës, Yuri Kim ka lënë të nënkuptohet se mund të tregojë një tjetër emër që nuk duhet të kandidojë në zgjedhjet e 25 prillit, pas paralajmërimit që bëri për kreun e Partisë SocialDemokrate, Tom Doshi.
Në një komunikim për mediat nga Durrësi, Kim tha se po diskuton për një çështje shumë të rëndësishme, kur u pyet nëse ka ndonjë emër tjetër që nuk duhet të kandidojë.
Pjesë nga biseda:
Yuri Kim: Vazhdoj ta theksoj se votuesit shqiptarë meritojnë më shumë. Nuk ka të bëjë me çfarë do SHBA-ja apo ambasada, por për atë që meritojnë votuesit shqiptarë.
Pyetje: Ju keni publikuar dokumentin kur flitet për emrin e Tom Doshit, po në Durrës, a ka ndonjë deputet që nuk duhet të kandidojë në zgjedhje?
Yuri Kim: Jam në bisedim për një çështje që është shumë e rëndësishme dhe në fund të ditës mund të them diçka edhe për këtë gjë.
Vetmë pak ditë më parë, ambasadorja Kim, pas një sërë deklaratash publike ku kërkonte që partitë të merrnin përgjegjësitë dhe të ndalonin garimin e personave me rekorde kriminale në zgjedhje dhe shpërfilljen nga politike, foli me emra. Kim tha se Tom Doshi nuk duhet të jetë si alternativë për qytetarët në këto zgjedhje, duke argumentuar se Doshi është në listën e zezë të DASH dhe nuk i lejohet hyrja në territorin amerikan.
Kreu i KQZ-së, Ilirjan Celibashi u tregua diplomat kur tha se çdo gj në lidhje me zgjedhjet është caktuar në Kushtetutë e duhet zbatuar. Socialistët nisën mbrojtjen e Doshit. Bushati i kujtoi sulmet në Capitol Hill ambasadores Kim duke shtuar se edhe SHBA-ja nuk është ‘imune’. Ndërsa Kryeministri Edi Rama, kyçi gojën, duke iu shmangur pyetjes.
Vetë Doshi e sfidoi totalisht këtë thirrje të ambasadores, duke depozitua kërkesën për tu regjistruar në zgjedhjet e 25 prillit.
