Dr. Anthony Fauci, zyrtari më i lartë i sëmundjeve infektive të SHBA-së, tha të dielën se do ta merrte vaksinën e sapo aprovuar Johnson & Johnson, duke iu përçuar kështu një mesazh amerikanëve që të merrnin një nga tre vaksinat e aprovuara në vend.
“Të trija janë me të vërtetë mjaft të mira dhe njerëzit duhet të marrin atë që është më në dispozicion për ta. Nëse shkoni në një vend dhe keni J&J, dhe kjo është ajo që është në dispozicion merreni. Unë do ta merrja J&J”, tha Fauci në “Meet the Press” të NBC, raporton Reuters.
Qeveria amerikane autorizoi vaksinën me dozë të vetme Johnson & Johnson të COVID-19 të shtunën, duke e bërë atë të tretën që do të jetë në dispozicion në vend pas Pfizer / BioNTech dhe Moderna.
Të dyja vaksinat kërkojnë dy doza dhe duhet të transportohen të ngrira. Vaksina J&J mund të transportohet dhe ruhet në temperatura normale të frigoriferit.
Vaksina e re i jep qeverisë amerikane një mundësi tjetër pasi përpiqet të imunizojë sa më shumë amerikanë sa më shpejt të jetë e mundur. Rreth 14% e amerikanëve kanë marrë të paktën një dozë deri më tani, sipas të dhënave të qeverisë.
