TIRANË– Kandidati për deputet nga radhët e Lëvizjes Socialiste për Integrim, Sokol Skura është vendosur në ‘shënjestër’! Jo më larg se dje, emisioni investigativ “Fiks Fare” publikoi një video të kandidatit në zonën e Librazhdit, ku edhe pretendohej se Skura po bënte pazar për shitblerje votash. Në investigimin e publikuar nuk flitet me çmime konkrete, por dëgjohet vetë kandidati Skura të pohojë se çmimin do e vendosi e do e ngrejë sa të dojë ai.
Nuk ka kaluar shumë kohë dhe lidhur me videon e publikuar ka reaguar vetë Skura, i cili ka drejtuar gishtin nga socialisti Taulant Balla. Sipas një sqarimi të bërë në rrjetet sociale, Skura pretendon Balla po kërkon ta dëmtojë pasi është kundërshtar i drejtpërdrejtë i tij në zonën e Librazhdit.
POSTIMI:
“Mashtrimet e inicuara nga Kryedeputeti jone “cuni i Librazhdit “. me sejmene te paguar qe me vjen turp tja permend dhe emrin se gjithe Librazhdi e njeh kush eshte qe kur kandidon per president federate nuk merr dhe voten e vet, nuk me intimidojne ne fitoren time ne 25 prill si kandidat i LSi dhe fitores tone ne keto zgjedhje. Mashtrimet, montimet dhe manipulimet ordinere te Taulant Balles dhe mediave rilindase vetem me bejne te qesh. Taulant kot lodhesh duke rritur pazarin e votave, parate qe i ke marre librazhdioteve do ti kthesh një me një. Suksese ne jete Tao une i pesti dhe ti i teti. Po vendos dhe linkun qe ta marrin vesh qytetaret e Librazhdit qe po rikthen kohen e Enver Hoxhes dhe sigurimin e shtetit,” shkruan ai.
Skura u arrestua ditën e hënë nga policia pasi u kap i dehur duke drejtuar makinën, ditën kur dhe Monika Kryemadhi e prezantoi si kandidat të LSI-së për qarkun e Elbasanit. Megjithatë Gjykata vendosi ndaj tij masën e sigurisë “detyrim paraqitjeje”. Kandidati i LSI-së nuk është emër i panjohur nga ana e policisë, pasi në vitin 2015, është arrestuar pasi ka qenë duke i dhënë makinës në gjendje të dehur dhe ka përplasur një këmbësor për vdekje. Më herët, Sokol Skura ka qenë pjesë e Partisë Socialiste që në vitin 2015, nga ku më pas është larguar për t’ju bashkuar Lëvizjes Soicaliste për Integrim. Po atë vit ai është akuzuar edhe për korrupsion në skandalin e grabitjes së rreth 500 milionë lekëve nga Fondi i Rimbursimit të Barnave.
