Tiranë- Shqipëria rrit ndjeshëm nivelin e sigurisë, pas sulmeve terroriste që tronditën Francën dhe Vjenën. Zyrtarët e antiterrorist thanë se niveli i sigurisë kaloi këtë të martë nga jeshil në portokalli. Plani I masave parashikon prani me të shtuar e forcave policore, pranë institucioneve të rëndësisë së vecantë, ambasadave, në aeroport, në porte, pikat e kalimit kufitar, në qendrat tregtare, si dhe në vendgrumbullimet kryesore në Tiranë.
Të njëjtat burime konfirmuan se do të shtohet prania e agjentëve civilë, ndërsa do të mbahen nën monitorim nga agjentë të antiterrorit elementë me prirje radikale. Siguria është shtuar ndjeshëm edhe në kampin e Manzës ku strehohen muxhahedinët. Zyrtarët konfirmuan se plani i masave do të zgjasë deri në fund të vitit, nisur edhe nga fakti se përpara janë festat e nëntorit, krishtlindja dhe viti i ri. Ditët e fundit në Francë u shënuan dy sulme të rënda terroriste.
Një mësuesi iu pre koka pasi iu tregoi nxënësve karikaturat e profetit Muhamed, të botuara më herët në revistën Charli Hebdo. Një tjetër sulm u krye në Nisë, në Kishën Notre Dam, ku tre persona u therën me thikë. Sulmi terrorist në zemër të Vjenës, shumë pranë një sinagoge, shënoi 4 të viktima dhe 15 të plagosur/ BalkanWeb
