Komisioni Qendror i Zgjedhjeve ka vendosur regjistrimin e listës shumë emërore të Partisë Social Demokrate, duke i hapur rrugë kështu kandidimit të Tom Doshit në zgjedhjet e 25 prillit.
Për Tom Doshin, SHBA foli me emër konkret, ku ambasadorja amerikane në Tiranë, Yuri Kim bëri thirrje që emra si Doshi nuk duhet të jenë në listën e kandidatëve në zgjedhje duke theksuar se “votuesit shqiptarë meritojnë më shumë”. Departamenti Amerikan i Shtetit e vendosi në “listën e zezë” Doshin, duke i ndaluar hyrjen në SHBA.
KQZ edhe më herët ka deklaruar se kërkesës së Ambasadës amerikane për mos lejimin e Tom Doshit që të marrë pjesë në zgjedhje, do t’i përgjigjet në bazë të legjislacionit shqiptar.
Ndërsa në mbledhjen e sotme KQZ deklaroi se: Asnjë prej kandidatëve për deputetë të PSD nuk ka deklaruar të dhëna që përbëjnë kusht për mosregjistrimin e tyre.
Ndërkohë nga radhët e PD, Ivi Kasa ka thënë se ky është rast i pastër ku dëbimi konsiderohet me burgim dhe sipas tij duhej të merrej në konsideratë kërkesa e SHBA.
Ivi Kaso: Është rast i pastër kur kandidati ka një vendim të barazuar me dëbimin. Shumë vende vendosin dëbimin në vend të burgimit. Konsiderohet i barasvlershëm. Qëndrimet e përfaqësive diplomatike të vendeve që kanë aplikuar këtë lloj mase, duhet të merren në konsideratë nga KQZ.
Më tej gjatë mbledhjes kreu i KQZ, Celibashi është shprehur se për të gjitha këto raste që ka indicie të tjera publike, KQZ do të bëjë verifikim të thelluar si dhe do t’i kërkohet Prokurorit të Përgjithshëm që të japë informacione dhe të dhëna shtesë.
Tom Doshi, që detyroi ambasadoren amerikane që të bënte disa reagime, do të kandidojë në Tiranë dhe në Shkodër për zgjedhjet e 25 prillit. PSD, partia e drejtuar nga Engjëll Bejtja nën logon e së cilës po kandidon Doshi është konfirmuar se nuk ka asnjë kandidat që të përbëjë kusht për të mos u regjistruar në zgjedhje.
