Presidenti i Republikës Ilir Meta ka reaguar në lidhje me zjarrin në magazinën e një qendre tregtare, ku dy persona dyshohet se kanë mbetur brenda.
Zjarri, i cili ka rënë prej dy ditësh dhe nuk po menaxhohet dot ka detyruar Kreun e Shtetit, t’i bëjë thirrje institucioneve që të ndërpresin aktivitetin politik dhe të marrin përgjegjësitë sipas ligjit.
Duhet t’i kërkohet ndihmë partnerëve, shkruan Presidenti, pasi qëndrimi duarkryq është i papranueshëm dhe i dënueshëm.
Reagimi i Presidentit Meta:
Alarm për institucionet shtetërore!Prej pasdites së 24 marsit 2021, një tragjedi e vërtetë po ndodh vetëm 3 km larg nga qendra e Tiranës, në ambientet e një biznesi privat, të përfshirë nga flakët, që ende nuk janë shuar.Sipas të dhënave paraprake një qytetar, me detyrën Përgjegjës i Sigurisë, dyshohet edhe për një shtetas të dytë, kanë mbetur të bllokuar në magazinat e katit të nëndheshëm, ndërkohë që dëmi pasuror i biznesit llogaritet në shifra tepër të larta.Duke shpresuar, që kjo ngjarje e rëndë të marrë fund me sa më pak pasoja, u bëj thirrje drejtuesve të Ministrisë së Brendshme dhe asaj të Mbrojtjes, strukturave të Mbrojtjes Civile dhe në veçanti Shërbimit Zjarrfikës të ndërpresin aktivitetet politike, të marrin përgjegjësitë e tyre sipas ligjit dhe të kryejnë me përgjegjshmëri të lartë detyrën e tyre.T’u kërkohet ndihmë vendeve partnere nëse ne nuk i kemi kapacitet për ta menaxhuar këtë situatë, por qëndrimi duarkryq është i papranueshëm dhe i dënueshëm.U bëj thirrje të fortë institucioneve shtetërore të reagojnë sa më parë për t’i dhënë zgjidhje të menjëhershme kësaj situate tepër të rëndë dhe me pasoja tepër serioze!
