Komisioni Irlandez për Mbrojtjen e të Dhënave do të nisë një hetim për një rrjedhje të të dhënave personale të miliona përdoruesve të Facebook. BBC shkruan se Facebook ka pasur në rrjedhje informacioni, ku rreth 533 milion njerëzve u kanë dalë të dhënat.
Facebook në një deklaratë tha se do të bashkëpunonte plotësisht me KI-në për të zbuluar pikën rrjedhëse të informacioneve. Në një deklaratë, Kompania tha se hetimi “lidhet me karakteristikat që e bëjnë më të lehtë për njerëzit të gjejnë dhe të lidhen me miqtë në shërbimet tona. Këto karakteristika janë të zakonshme për shumë aplikacione dhe ne shpresojmë t’i shpjegojmë ato dhe mbrojtjet që kemi vendosur”.
Ndërsa KI në një njoftim tha se Komisioni do të investigojë dhe analizojë të gjithë rrjedhën e ngjarjes, për të parë nëse Facebook i ka përmbushur deyrimet e tij apo jo.
“Prandaj, komisioni e konsideron të përshtatshme për të përcaktuar nëse Facebook ka përmbushur detyrimet e tij, si kontrollues i të dhënave, në lidhje me përpunimin e të dhënave personale të përdoruesve të tij“, thuhet në njoftim.
Databaza e 533 milion njerëzve nga 106 vende u botua në një forum piraterie në fillim të këtij muaji. Fillimisht Facebook i quajti këto rrjedhje informacionesh si të vjetra, të vitit 2019, ndërkohë më vonë e pranoi që të dhënat e nxjerra ishin të tanishme.
