BBC ka kërkuar publikisht falje për intervistën e bujshme të Princeshë Diana-s me gazetarin Martin Bashir, i cili prej kohësh po hetohet për akuzat se e ka mashtruar princeshën me dokumente të falsifikuara për të siguruar intervistën e saj.
William ka fajësuar gënjeshtrat e BBC-së ndaj nënës së tij, princeshës Diana, për nxitjen e paranojës së saj dhe përkeqësimin e marrëdhënies së prindërve të tij.
Pasi një hetim zbuloi se BBC ra nën standardet e saj, Princi William tha se ai ishte më i pikëlluari që Diana nuk e mësoi kurrë se ishte mashtruar. Ai tha se nëna e tij ishte gënjyer “jo vetëm nga një reporter mashtrues”, por edhe nga drejtuesit e BBC-së.
Ndërsa Harry fajësoi një kulturë mediatike toksike për vdekjen e nënës së tij. Në deklaratën e tij të veçantë, Princi Harry tha se “efekti i një kulture të shfrytëzimit dhe praktikave joetike” ishte shkaku që i mori jetën nënës së tij.
Ai shprehu shqetësimin për praktika të tilla që, siç theksoi, janë ende të përhapura edhe sot.
“Nëna jonë humbi jetën për shkak të kësaj dhe asgjë nuk ka ndryshuar. Duke mbrojtur trashëgiminë e saj, ne mbrojmë të gjithë dhe mbajmë dinjitetin me të cilin ajo e jetoi jetën e saj,” tha ai.
Princi Philip, Princi William, Earl Spencer (vëllai i Diana-s), Princi Harry dhe Princi Charles në funeralin e Princeshë Diana-s, shtator 1997.
