Skënderbeu bën goditjen e parë në merkaton e verës dhe është pikërisht një brazilian për qendrën e mesfushës. “Panorama Sport” zbulon ekskluzivisht se 25-vjeçari Murilo Augusto Lino Rosa ka arritur marrëveshjen me klubin korçar dhe do të jetë gati për trajnerin Migen Memelli kur Skënderbeu do të nisë përgatitjet për sezonin 2021-2022.
Burime në klubin korçar i treguan gazetës se po ndiqet e njëjta linjë për merkaton, ku krahas të rinjve shqiptarë, pikasen edhe elementë që po shkëlqejnë në ligat e dyta të Portugalisë. Një prej tyre ishte Zhan Viktor, që erdhi në janar te Skënderbeu pas disa viteve në vendin luzitan.
Tashmë drejtuesit kanë mbyllur gjithçka me Murilo Rosën, i cili është një numër 8 tipik, që ka shkëlqyer me skuadra si Sanjoanense, Lusitano FCV dhe Benfika Castelo në ligat e ulëta portugeze.
Mesfushori është studiuar mirë nga drejtuesit korçarë përpara se klubi të futej në bisedime me agjentin e brazilianit. Rosa forcon qendrën e mesfushës, aty ku Skënderbeu ka pasur probleme në sezonin e fundit, pasi edhe alternativat nuk kanë qenë të shumta.
Marrë nga Panorama Sport
