Nuk ka vonuar reagimi i parë nga Presidenca, pasi Kuvendi e shkarkoi kreun e shtetit, Ilir Meta me 104 vota pro.
Me këtë foto të Kuvendit të mbushur me mbeturina, ka ironizuar shkarkimin e Presidentit, zëdhënësi dhe këshilltari i Ilir Metës, Tedi Blushi.
Në postimin e tij në rrjetet sociale, këshilltari i Metës thotë se ky vendim i Kuvendit sjell ‘zero shqetësim’.
Teksa e quan shkarkimin një vendim “antikushtetues dhe qesharak i landfillit parlamentar monist”.
Deklarate e zedhenesit te Presidentit te Republikes, Tedi Blushi:
Zero shqetësim nga vendimi antikushtetues dhe qesharak i landfillit parlamentar monist, që do të hyjë si rast studimor në historinë botërore të parlamentarizmit, se si një Kuvend pa opozitë, që edhe pse është shkarkuar me votë nga populli, voton për shkarkimin e një institucioni tjetër! Asnjë surprizë nga tregtari i kufijve të Shqipërisë dhe të Kosovës, partnerët dhe vasalët e oligarkëve, mafia e inceneratorëve, grabitësit e votave, parave dhe të pronave të shqiptarëve, përfshi edhe torollakët e dobishëm, që nuk bënë gjë tjetër sot, veçse plotësuan edhe hapin e fundit të krimit të rëndë zgjedhor të 25 prillit. Të paktën veç pensionit të përjetshëm, i siguruat edhe për këtë vit një palë pushime qyl! Bravo ju qoftë, që nuk dolët pa gjë nga kjo shëmti! Presidenti i Republikës Sh.T.Z Ilir Meta është më i motivuar se kurrë për mbrojtjen e sovranitetit dhe integritetit të Shqipërisë nga çdo përpjekje e tradhëtarëve, bashkëpunëtorëve dhe tutorëve të tyre, që punojnë prej vitesh kundër vendit tonë, shqiptarëve dhe interesit kombëtar. Një ftesë e sinqertë edhe për kolegët gazetarë: Merruni me gjëra serioze, zbardhjen, hetimin e plotë dhe dënimin e krimeve zgjedhore!
