Fansat e Guns N ‘Roses më në fund mund të shijojnë muzikë të re të grupit, 13 vite pas këngës së fundit.
Rokerët legjendarë publikuan këngën e tyre të re “Absurd” javën që lamë pas, duke postuar në Twitter edhe një video me një fragment të këngës. Ky është krijimi i parë në studio nga grupi, që prej albumit të vitit 2008, “Chinese Democracy”.
Sipas revistës Rolling Stone, “Absurd” është një version i ripunuar i një kënge të mëparshme të Guns N ‘Roses, “Silkworms”, e cila nuk u publikua kurrë zyrtarisht.
Në një video tjetër të postuar në llogarinë e tyre në Twitter të enjten pasdite, grupi shfaqet duke interpretuar këngën drejtpërdrejt.
Guns N ‘Roses aktualisht janë në një turne në Amerikën e Veriut që përfundon në fillim të tetorit. Një tjetër turne në Australi dhe Zelandën e Re është planifikuar për këtë vjeshtë. Ndërsa në Evropë ata pritet të mbajnë një turne në verën e vitit 2022.
