Në datat 12 dhe 13 gusht “Nona” bëri bashkë Drejtorinë e Përgjithshme të Arkivave dhe Bashkinë e Përmetit në një festë që i dedikohet kryesisht gjysheve dhe qytetit. Në Përmetin e mbushur me dashuri, përkëdhelje dhe arome gjyshesh u prezantuan një ekspozitë rrugëtuese me momente historike të qytetit që ka gjithçka përveç detit.
Drejtori i Përgjithshëm i DPA Ardit Bido e shpjegon në këtë mënyrë qëllimin e saj.
“Qëllimi i kësaj ekspozite është që të rinjtë të kuptojnë në dorë të parë përmes fotove dhe dokumenteve se si ka qenë realiteti i kohës që shoqërohet me rrëfenjat e gjysheve përmetare. Pikërisht këto rrëfenja kthehen në realitet përmes dokumenteve të Arkivit”.
Bido paralajmëroi realizimin e të tjera projekteve në të ardhmen me Bashkinë e Përmetit.
“Do të shtrijmë bashkëpunimin më tej sepse së shpejti do të sjellim dhe në Përmet këndin arkivor ku studiuesit e ketij qyteti do të kenë mundësi të shfrytëzojnë materialet e arkivit, pa pasur nevojë të vijnë në Tiranë”.
Kryetarja e Bashkisë Përmet, Alma Hoxha, vlerësoi bashkëpunimin dhe faktin që dokumenetet e veçanta të ekspozitës po tërheqin vëmendjen e qytetarëve të Përmetit.
“Në kuadër të festës së Nonës, vjen dhe kjo ekspozitë në bashkëpunim me Drejtorinë e Përgjithshme të Arkivave. Një ekspozitë me dokumente shumë interesante dhe të veçanta që po tërheq vëmendjen e qytetarëve të Përmetit. Aktivitete të tilla kulturore në këto ditë sjellin në qytetin tonë dhe institucione si DPA. Ky është dhe një hap i parë për të shtrirë më tej bashkëpunimin midis dy institucioneve”.
Ekspozita do të qëndrojë e hapur për tre ditë në qendër të qytetit, në kuadër të Festës së Nonës.
