ITALI – Mirko Tonkov, babai i Mattias, djalit dhjetëvjeçar shqiptar të vrarë pasditen e djeshme në Cura di Vetralla, në zonën e Viterbos, në Itali, është arrestuar për vrasje dhe po ruhet në spitalin Belcolle nga karabinierët.
Sipas Italy 24, polaku 44-vjeçar kishte një urdhët për ndalim afrimi ndaj familjes së tij. Ai ishte i shtruar në spital në Romë nga Covidi por u arratis që aty dhe shkoi në shtëpinë ku fëmija jetonte me nënën e tij, në Vetralle. Në banesë ishte vetëm 10-vjeçari të cilin ai e vrau duke i prerë fytin me thikë.
Nëna e tij, Mariola Rapaj, një 32-vjeçareje shqiptare e gjeti të birin duke vdekur kur u kthye në banesë nga puna, rreth orës 15.30 teksa Tonkov ishte në dhomën tjetër në gjendje të pavetëdijshme.
“Me dhimbje të thellë mësojmë lajmin për vrasjen e bashkëqytetarit tonë të vogël. Mattias ishte vetëm 10 vjeç dhe gjeti vdekjen në mënyrë të pashpjegueshme. Një histori që na lë të habitur dhe të tronditur duke pritur që drejtësia të marrë rrugën e saj, duhet të na çojë drejt reflektimit, kujtimit dhe lutjes”, shkruante kryebashkiaku Sandrino Aquilani në faqen e Facebook-ut.
Polaku kishte qenë shumë i dhunshëm si me djalin ashtu edhe me gruan e tij ndaj ajo e kishte denoncuar. 35-vjeçarja ishte shumë e frikësuar, aq sa i thoshte djalit të saj që të mos ia hapte derën askujt, përfshirë edhe babit. Por i vogli Mattias dje i hapi derën babait të tij, i cili e vrau me një thikë në fyt.
