Tre partitë gjermane kanë arritur një marrëveshje për të formuar një qeveri të re që do t’i japë fund epokës së kancelares Angela Merkel dhe Olaf Scholz është emri që do ta zëvendësojë atë në detyrë.
Sipas CBS, Scholz, i socialdemokratëve të qendrës së majtë, tha se ai pret që anëtarët e partive të japin bekimin e tyre për marrëveshjen në 10 ditët e ardhshme. Në një konferencë shtypi, Scholz dhe udhëheqës të tjerë dhanë disa indikacione se si do të qeveriste koalicioni.
Ndër masat e para të rënë dakord janë vaksinimet e detyrueshme në vendet ku ka personat veçanërisht të cenueshëm, me opsionin e zgjerimit të këtij rregulli. Kjo vjen pasi Gjermania po sheh një rritje të rasteve dhe tranzicioni politik ka penguar disi reagimin e vendit. Scholz theksoi gjithashtu rëndësinë e një Evrope sovrane, miqësinë me Francën dhe partneritetin me Shtetet e Bashkuara si gurët e themelit të politikës së jashtme të qeverisë duke vazhduar një traditë të gjatë të pasluftës.
“Qeveria e re nuk do të kërkojë emëruesin më të ulët të përbashkët, por politikën e ndikimeve të mëdha”, premtoi Scholz.
Ndërkohë, Robert Habeck, bashkëdrejtues i partisë ambientaliste të Gjelbërve, tha se masat e planifikuara nga qeveria do ta vendosnin Gjermaninë në një rrugë për të përmbushur objektivat e marrëveshjes së klimës së Parisit të vitit 2015. Social Demokratët kanë negociuar me të Gjelbërit dhe Demokratët e Lirë pro-biznesit që kur fituan ngushtë zgjedhjet kombëtare në 26 shtator.
Nëse anëtarët e partisë e nënshkruajnë atë, aleanca trepalëshe, e cila nuk është provuar ende në një qeveri kombëtare, do të zëvendësojë “koalicionin e madh” aktual të partive të mëdha tradicionale të vendit. Social Demokratët kanë shërbyer si partneri më i vogël i Kristian Demokratëve të qendrës së djathtë të Merkelit. Merkel, e cila nuk kandidoi për një mandat të pestë, pritet të pasohet nga Scholz, 63 vjeç, i cili ka qenë ministër i financave dhe zëvendëskancelar i saj që nga viti 2018.
