Sot Komisioni i Posaçëm i Apelimit (KPA) vendos për ‘fatin’ e gjyqtares Enkelejda Hoxha. Kjo e fundit ka animuar vendimin e KLGj, e cila e shkarkoi pas arrestimit nga SPAK në superoperacionin e Gjykatës së Krujës. Në seancën e sotme, Hoxha ishte e pranishme, ku kërkoi që t’i viheshin në dispozicion një kopje e të gjitha shkresave lidhur me argumentimin e bërë nga KLGJ për kërkesën për shkarkimin e saj.
Diskutimet
Hoxha: Desha të sqaroj lidhur me shkresën që ju keni përcjellë drejtorisë së burgjeve, për të më shoqëruar në ambientet e KPA në 13 janar, 15:00 për t’u njohur me aktet e KLGJ. Po atë ditë kam pasur 2 gjykime të tjera në GJKKO, që nuk jam paraqitur se kam qenë sëmurë dhe kam autorizuar avokatin. Nga stafi i institucionit, nga gardianët, më është njoftuar në 13:00, efektivisht edhe e pamundur isha për t’u paraqitur, por duke parë shkresën dhe dokumentacion voluminoze, nga 11 shkurt 2021 jam e paraburgosur nuk kam mundësi që të njihem apo të punoj për këto akte, do doja që të më viheshin në dispozion të gjitha aktet.
Gjyqtarja: Të njiheni në ambientet e Kolegjit, jo duke vënë në dispozicion një kopje, ekziston mundësia?
Hoxha: Edhe mund t’i shoh, po do të doja të kisha një kopje të tyre, kundrejt shpenzimeve që mund t’i mbulojnë familjarët e mi
Avokati: E drejtë e saj, nuk mund të shkel, e respektoj
Gjyqtarja: KLGJ dhe ILD, sa i përket kërkesës së Hoxhës për të marrë dokumentet….
Përfaqësuesi i KLGJ: Të njihet është e drejta e saj,
Përfaqësuesi i ILD: I lëmë në vlerësim të Kolegjit
Enkelejda Hoxha u shkarkua nga detyra e gjyqtares më 17 mars dhe u la në burg nga Gjykata e Apelit. Ajo u arrestua nga SPAK pas një superoperacioni të bërë në Gjykatën e Krujës, në seancë gjyqësore teksa po lironte një tjetër të dënuar. Mes të dënuarve janë edhe sekretarja e Gjykatës, Emanuela Mallkuçi ekspert shëndetësor dhe avokati Aldo Tabaku të cilët në bazë të një skeme të mirëfilltë kriminale bënin lirimin e të dënuarve.
