Transferimi i Myrto Uzunit te Granada në Spanjë ka krijuar kuriozitet shumë të madh, pasi të gjithë presin me padurim të shohin se si do të paraqitet sulmuesi i përfaqësueses shqiptare në La Liga, një prej kampionateve më të fortë në botë. Futbollisti ka udhëtuar drejt Spanjës dhe pritet që të nënshkruajë me klubin e La Liga duke bërë hapin e madh në karrierë.
Nëse për tifozët shqiptarë ky lajm mund të sjellë entuziazëm, duket se për futbollistin ka pritshmëri të madhe edhe në Spanjë dhe kjo shihet nga artikujt e mediave më të mëdha sportive spanjolle. E përditshmja “Marca” ka titulluar artikullin e saj “Arezo dhe Uzuni, dy bombat e Granadës për të mbyllur merkaton”. “Uzuni është sulmues polivalent, mund të luajë në të dy krahët dhe në majë të sulmit, duke ofruar zgjidhje të ndryshme për Robert Morenon”, shpjegon e përditshmja sportive spanjolle.
Edhe “AS” përshkruan si një goditje të madhe këtë lëvizje të Granadës. “Uzuni dhe Arezo, dy bomba të orës së fundit për Granadën’, shkruhet në artikullin e saj. “Në moshën 26-vjeçare, Uzuni është një futbollist i rregull në radhët e kombëtares së vendit të tij. Në këtë sezon ka shënuar 7 gola në kampionat, 8 në Kupë në 2 ndeshje, 4 në Ligën e Kampioneve dhe 2 në Ligën e Europës”, është mënyra se si “AS” përshkruan sulmuesin shqiptar për të cilin tashmë duket qartësisht se ka shumë pritshmëri, edhe pse do të jetë eksperienca e tij e parë në një kampionat kaq të rëndësishëm.
