Bashkimi Europian, së bashku me Shtetet e Bashkuara dhe partnerët e tjerë perëndimorë, kanë njoftuar sanksione të mëtejshme ndaj Rusisë pas pushtimit të Ukrainës, duke përfshirë përjashtimin e një numri bankash ruse nga sistemi i pagesave ndërbankare SWIFT.
SWIFT është rrjeti kryesor i pagesave ndërkombëtare në botë. Reuters shpjegon më shumë rreth asaj që bën ky sistem dhe pse ka rëndësi:
ÇFARË ËSHTË SWIFT
SWIFT, ose “Shoqëria për Telekomunikacionin Financiar Ndërbankar në mbarë botën”, është një sistem i sigurt mesazhesh që lehtëson pagesat e shpejta ndërkufitare, duke bërë që tregtia ndërkombëtare të vijojë pa probleme.
Bankat që lidhen me sistemin SWIFT dhe krijojnë marrëdhënie me banka të tjera mund të përdorin mesazhe SWIFT për të kryer pagesat.
Mesazhet janë të sigurta dhe kjo bën që udhëzimet e pagesës të respektohen zakonisht pa diskutim. Kjo i lejon bankat të përpunojnë vëllime të larta transaksionesh me shpejtësi. Ai është bërë mekanizmi kryesor për financimin e tregtisë ndërkombëtare.
Në vitin 2020, rreth 38 milionë mesazhe ‘FIN’ të SWIFT dërgoheshin çdo ditë përmes platformës SWIFT, sipas Raportit Vjetor 2020. Çdo vit, triliona dollarë transferohen duke përdorur këtë sistem.
KUSH E ZOTĚRON SWIFT?
SWIFT, i themeluar në vitet 1970, është një bashkëpunim i mijëra institucioneve anëtare që përdorin shërbimin.
Ai ka bazën në Belgjikë. SWIFT realizoi një fitim prej 36 milionë euro në vitin 2020, sipas Raportit të tij Vjetor 2020.
PSE ËSHTË AQ SERIOZ NJË NDALIMI I SWIFT?
Përjashtimi i bankave ruse nga SWIFT kufizon aksesin e vendit në tregjet financiare në mbarë botën.
Kompanitë dhe individët rusë do ta kenë më të vështirë të paguajnë për importet dhe të marrin para për eksporte, të marrin hua ose të investojnë jashtë shtetit.
Bankat ruse mund të përdorin kanale të tjera për pagesa si telefonat, aplikacionet e mesazheve ose emailet.
Kjo do t’i lejonte bankat ruse të bënin pagesa nëpërmjet bankave në vendet që nuk kanë vendosur sanksione, por meqenëse alternativat ka të ngjarë të jenë më pak efikase dhe të sigurta, vëllimet e transaksioneve mund të bien dhe kostot të rriten.
SI NDIKON NDALIMI I SWIFT NË RUSI TE SHTETET ETJERA?
Eksportuesit do ta konsideronin shitjen e mallrave në Rusi më të rrezikshme dhe më të shtrenjtë. Rusia është një blerës i madh i mallrave të prodhuara.
Holanda dhe Gjermania janë partnerët e saj të dytë dhe të tretë më të mëdhenj tregtarë, bazuar në të dhënat e Bankës Botërore, megjithëse Rusia nuk është një nga 10 tregjet kryesore të eksporteve për asnjërin vend.
Blerësit e huaj të mallrave ruse do ta kishin gjithashtu më të vështirë, duke i shtyrë ata të kërkojnë furnizues alternativë./Reuters
Marrë nga Monitor.al
