BRITANI E MADHE– Vrasësi serial Levi Bellfield është fejuar dhe kërkon që të martohet në burg, konfirmon Ministria e Drejtësisë. Bellfield ka aplikuar për leje për t’u martuar me një grua, teksa ndodhet i burgosur përjetë për vrasjen e nxënëses Milly Dowler, Marsha McDonnell dhe Amelie Delagrange, raporton Skynews.
The Sun tha se ai u fejua me një vizitore femër, duke iu ulur gjunjë për të propozuar martesë para stafit të burgut në HMP Frankland në County Durham.
Një zëdhënës i Ministrisë së Drejtësisë tha: “Është marrë një aplikim dhe po shqyrtohet në mënyrën e zakonshme”.
Bellfield u dënua me dënim të përjetshëm për vrasjen e McDonnell, në vitin 2003, vrasjen e Delagrange, 22 vjeç dhe tentativën për të vrarë Kate Sheedy, në 2004. Ai po vuante dënimin kur doli në gjyq për vrasjen e nxënëses Milly, e cila u rrëmbye nga rruga duke ecur nga shkolla në shtëpinë e saj në Walton-on-Thames, Surrey, në mars 2002. Bellfield u shpall fajtor për rrëmbimin dhe vrasjen e 13-vjeçares.
