Ka ndërruar jetë gjatë natës në spital 17-vjeçari që u përplas ditën e djeshme me makinë nga ish-kryetari i Bashkisë së Himarës, Vasil Bollano. Elio Hamiti u dërgua dje në spitalin e Traumës në Tiranë, si pasojë e lëndimeve të rënda trupore që mori gjatë përplasjes.
Raportohet se i riu ka ndërruar jetë gjatë natës.
Ndërkohë Bollano është shoqëruar në komisariat për veprime të mëtejshme. Në dëshminë e tij të parë, Bollano ka deklaruar se i riu është hedhur përpara makinës, por duket se ky version nuk i ka bindur ekspertët e policisë të cilët pasi hetuan ngjarjen, shoqëruar ish-kryebashkiakun në komisariat.
Njoftimi i Policisë
Vlorë
Specialistët e Qarkullimit Rrugor arrestuan në flagrancë shtetasin V. B., 66 vjeç, banues në Himarë.
Ky shtetas, ditën e djeshme, rreth orës 17:00, duke drejtuar automjetin, në aksin rrugor Orikum-Llogara, në afërsi të fushës së sportit, ka aksidentuar shtetasin E. H., 17 vjeç, banues në Dukat, i cili lëvizte në këmbë.
Si pasojë e dëmtimeve të marra 17-vjeçari ka ndërruar jetë në Spitalin e Traumës, Tiranë.
Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme, për veprën penale “Shkelja e rregullave të qarkullimit rrugor”, me pasojë vdekjen.
