Tiranë- Presidenti, Ilir Meta ka rikujtuar sot 100- vjetorin e pranimit të Shqipërisë në Lidhjen e Kombeve.
“Të sapo dalë nga Lufta e Parë Botërore, ne u pranuam të barabartë si të gjithë kombet e tjera”, shkruan presidenti Meta. Pranimi i Shqipërisë në Lidhjen e Kombeve lidhet ngushtë edhe me kontributin që dha presidenti amerikan i asaj kohe, Thomas Woodrow Wilson, i cili nëpërmjet një plani me 14 pika hodhi themelet e një paqeje të barabartë në Europë.
Postimi i plotë i Presidentit Meta
“Si sot, 100 vjet më parë, Shqipëria pranohet anëtare me të drejta të plota në Lidhjen e Kombeve. Ky akt unik në historinë e kombit tonë, sanksionoi shtetin shqiptar si subjekt të së drejtës ndërkombëtare, por mbi të gjitha përforcoi sovranitetin, rikonfirmoi pavarësinë dhe vendosi garanci për kufijtë e caktuar nga Konferenca e Ambasadorëve të Londrës të vitit 1913. Mundi, sakrificat dhe luftërat e popullit shqiptar, sidomos përpjekjet diplomatike të patriotëve, kudo ku ndodheshin, veçanërisht të Federatës Patriotike “Vatra” dhe kryetarit të delegacionit shqiptar në Lidhjen e Kombeve, Fan S. Noli, u kurorëzuan nëpërmjet këtij akti jashtëzakonisht të rëndësishëm, që e pranoi Shqipërinë, edhe pse të lodhur e të copëtuar nga Lufta e Parë Botërore, si të barabartë mes të gjitha kombeve, me të drejtat dhe detyrimet, që buronin nga anëtarësimi në këtë organizatë.Mirënjohje për kontributin e spikatur të Presidentit amerikan Thomas Woodrow Wilson, i cili nëpërmjet planit të Tij prej 14 pikash hodhi themelet e një paqeje të barabartë në Europë, krijimin e konceptit të kombeve me të drejta të barabarta, pavarësisht madhësisë së tyre dhe vizionin për një organizatë të sigurisë kolektive si Lidhja e Kombeve.”– shkruan presidenti Meta në psotimin e tij.
