Alban Ramasoj fiton edicionin e 22-të të Këngës Magjike 2021. “Thikat e mia”, një këngë e thellë, revoltë dashurie, u pëlqye që me prezantimin e parë dhe u bë virale për javë të tëra në rrjet. Albani arriti të sigurojë votat e kolegëve këngëtarë, të jurisë së festivalit, por njëkohësisht edhe votat e publikut duke siguruar kështu çmimin e parë.
Pas fitores, mjaft i emocionuar e i përlotur, Albani tha se nuk i gjen dot fjalët. Duke falënderuar të gjithë kolegët që e kanë mbështetur dhe votuar, ai mundi të thoshte:
“Faleminderit të gjithëve! E kam menduar këtë moment dhe nuk po më besohet akoma, nuk kam fjalë. Faleminderit nga shpirti, nga zemra, më rikujtuat arsyen përse bëj këtë që bëj. Ju falënderoj nga shpirti edhe njëherë. Ndihem më i vlerësuar se kurrë, jam pa fjalë. Faleminderit nga shpirti”.
Pasi mori kupën, ai kërkoi me sy të ëmën, që ishte e pranishme në sallë, dhe ia dedikoi asaj çmimin e parë: “Mam, ku je? Kjo është për ty dhe për gjithçka ke bërë për mua”, – tha ende pa e mbledhur veten nga emocionet.
Vendi i dytë i këtij edicioni shkoi për Klajdi Harunin dhe Flori Mumajesin, ndërsa në vend të tretë u vlerësua artistja gjeorgjiane, Nutsa.
