Nga Nick Beake, BBC News
Pavarësisht deklaratave që kumbuan në selinë e NATO-s për mbështetje ndaj Ukrainës dhe vendosmëri për të ndëshkuar Rusinë financiarisht, unë sapo pata një pasqyrë të qartë nga një zyrtar perëndimor që ishte brenda në takimin e liderëve të aleancës.
Me sa duket, asnjë lider i NATO nuk mundi të jepte ndonjë të dhënë se sanksionet kishin filluar të ndryshonin mendjen e Putinit ose të ndikonin në sjelljen e tij për luftën kundër Ukrainës.
Strategjia e NATO-s po mbështetet tani te furnizimi i ukrainasve me armë, ndërkohë që po presin efektin e sanksioneve të paprecedenta financiare të vendosura ndaj Rusisë ta bindin atë të ndalojë sulmin ndaj fqinjit.
Por për miliona ukrainas, – të zhvendosur nga lufta dhe duke fjetur në bunkerë për një muaj – kjo është pritja më e tmerrshme. Më shumë civilë do të vdesin teksa lufta vazhdon.
Liderët e NATO-s këmbëngulin publikisht dhe në prapaskenë se po bëjnë gjithçka që munden për të armatosur Ukrainën, duke mos e përshkallëzuar konfliktin ose duke mos u përfshirë drejtpërdrejt – gjë që thonë ata, mund të ketë pasoja të tmerrshme.
Më kujtohet familja e re që takova saktësisht një muaj më parë, në rrugët e Kievit në strehën e një stacioni metroje menjëherë pasi Rusia kishte nisur sulmin e saj. Aleksandri duke përqafuar djalin e tij të vogël më pyeti: “Kur do të na ndihmojë NATO?”
Shumë ukrainas duan shumë më tepër mbështetje nga miqtë e tyre të fuqishëm perëndimorë, dhe ata e duan atë tani.
