Policia italiane dhe spanjolle kanë arrestuar shefin e mafias famëkeqe Ndrangheta, mafia që kontrollon tregtimin e drogës në Itali si dhe pastrimin e parave dhe është bërë shkak për shumë skandale korrupsioni. Ai ishte në arrati pasi doli nga burgu për shkak të një gabimi gjyqësor në tetor të vitit 2019.
Policia italiane dhe spanjolle arritën të kapnin ish-shefin mafioz Domenico Paviglianiti në Madrid. 60 vjeçari konsiderohet si një nga njerëzit më të kërkuar në Itali dhe kapja e tij u quajt një “sukses historik” nga policët spanjollë dhe italianë.
Policia spanjolle shpërndau videon e arrestimit të tij në Twitter dhe kanalet shtetërore të vendit. Ata gjithashtu gjetën 6 telefonë, një pasaportë portugeze të falsifikuar dhe 6,000 euro.
Bosi mafioz u dënua me burgim të përjetshëm në vitet 80-të por dënimi i tij u zvogëlua në 30 vite. Ai u lirua në vitin 2019 për shkak të një gabimi gjyqësor dhe u largua nga Italia për në Spanjë. Ai u gjurmua nga policia e vendit përmes kontakteve me pjesëtarët e tij të familjes që jetonin në Spanjë.
