Ceremonia vjetore e Golden Globes nuk ka mundur të gjejë një partner televiziv për të transmetuar ceremoninë, asnjë personazh të famshëm që dëshiron ta prezantojë ose të japë çmimet pas bojkotit të Hollivudit për skandalin e diversitetit dhe etikës.
Sipas Variety, organizatorët nuk kanë arritur të bindin asnjë figurë të rëndësishme të Hollivudit që të marrë pjesë në edicionin e vitit 2022 të ceremonisë së ndarjes çmimeve, një ngjarje vjetore goxha prestigjioze më parë. Në mars të vitit 2021, më shumë se 100 firma të marrëdhënieve me publikun njoftuan se do të tërhiqnin bashkëpunimin me Golden Globes. Emra të famshëm si Tom Cruise dhe Scarlett Johansson, bënë kritika thumbuese publike dhe rrjeti televiziv NBC anuloi transmetimin e edicionit të vitit 2022.
Në një deklaratë në internet, organizata mëmë e Golden Globes, Hollywood Foreign Press Association (HFPA) tha se ceremonia do të zhvillohej të dielën në hotelin Beverly Hilton dhe do të “ndezë një dritë mbi punën filantropike prej kohësh të HFPA.” HFPA tha gjithashtu se eventi do të diskutojë edhe nismat për të përkrahur diversitetin, barazinë dhe gjithëpërfshirjen në të gjithë industrinë globale të argëtimit.
Asnjë media nuk do të lejohet brenda ceremonisë dhe nuk do të ketë tapet të kuq. Ende nuk është bërë e ditur nëse ceremonia do të transmetohet drejtpërdrejt. HFPA është përfshirë nga kriza që kur Los Angeles Times, në prag të Golden Globes 2021, e akuzoi organizatën për mungesë të diversitetit përsa u përket emrave të përfshirë në procesin e votimit si dhe për “boshllëqe etike” në mënyrën e drejtimit të biznesit.
