MAQEDONIA E VERIUT- Dy shqiptarë të moshave 24 dhe 28 vjeç B.V dhe A.B janë ekzekutuar me armë zjarri rreth orës 2:35 të mëngjesit të sotëm. Ngjarja e rëndë ka ndodhur në Shkup, në lagjen Fushë Tophanë e njohur ndryshe edhe si Çair, e banuar me shumicë shqiptare.
Mediat e Maqedonisë së Veriut shkruajnë se ngjarja ka ndodhur brenda pak sekondave, bazuar në hetimet paraprake. Viktimat ishin brenda një makine të parkuar krah një rruge, kur autorët janë afruar pranë tyre. Këta të fundit nga një makinë në ecje kanë ulu xhamin dhe kanë qëlluar drejt të dy shqiptarëve, duke i lënë të vdekur në vend.
Trupat e viktimave janë gjetur të ulur në sedilje të makinave, pak minuta pas vrasjes, ndërkohë që kanë nisur hetimet. Janë sekuestruar gëzhojat, gjurmë të gjetura në vendin e ngjarjes dhe pamjet filmike të kamerave të sigurisë së bizneseve të kësaj zone. Siç edhe shkruajnë mediat lokale, krimi ka ndodhur në mënyrë të bëfasishme dhe se mes autorëve e viktimave nuk është shkëmbyer asnjë fjalë.
Gjatë atentatit autorët mësohet se kanë përdorur dy armë zjarri, referuar gëzhojave të gjetura, por nuk dihet ende se sa persona kanë qenë. Dyshohet se edhe autorët e krimit, njësoj si viktimat janë shqiptarë, por ende janë të paidentifikuar.
Në vendngjarje nuk ka pasur dëshmitarë për shkak të orës së vonë kur ka ndodhur krimi, por po merrne në pyetje familjarët dhe miqtë e viktimave për të zbardhur ndonjë konflikt që dy të rinjtë mund të kenë pasur më herët.
