200 palë atlete Louis Vuitton dhe Nike Air Force 1, të krijuara nga dizajneri i ndjerë amerikan, Virgil Abloh, janë shitur për një total prej 25 milionë dollarësh, tha shtëpia e ankandeve Sotheby’s.
Shumat e atleteve i tejkalojnë vlerësimet fillestare të Sotheby’s, i cili filloi ofertën me 2,000 dollarë për palë dhe kishte parashikuar se do të shiteshin nga 5,000 deri në 15,000 dollarë secila. Në fund, atletet u shitën mesatarisht për më shumë se 100,000 dollarë për palë. Më të lirat u shitën për pak më shumë se 75,000 dollarë, ndërsa më të shtrenjtat për 350,000 dollarë.
Këpucët e koleksionit të veçantë, të përbëra prej lëkure viçi, u krijuan fillimisht për koleksionin e meshkujve Pranverë-Verë 2022 të Louis Vuitton, drejtor artistik i të cilit ishte Abloh. Atletet kafe, të bardha dhe ngjyrë kremi me monogramin e dallueshëm dhe motivet e Louis Vuitton u realizuan për të festuar 40-vjetorin e Nike Air Force 1. Të ardhurat nga shitja do të shkojnë për një fond bursash të krijuar nga Virgil Abloh që mbështet dizajnerët aspirantë me origjinë afro-amerikane ose afrikane.
Në nëntor të vitit 2021, Abloh, i cili ishte drejtori artistik i Louis Vuitton për koleksionin e veshjeve për burra dhe drejtori ekzekutiv i Off-White, u nda nga jeta në moshën 41-vjeçare si pasojë e kancerit.
Me përvojë në arkitekturë, Abloh i hyri botës së modës përmes street fashion. Në vitin 2009, ai kreu një praktikë te Fendi së bashku me Kanye West. Pas kësaj, bashkëpunoi me Kanye dhe nisi themelimin e Off-White. Virgil Abloh ishte amerikani i parë me origjinë afrikane që ishte drejtor artistik i një shtëpie mode luksoze franceze. Në vitin 2018, ai u cilësua nga revista Time si një nga 100 njerëzit më me ndikim në botë.
