TIRANË-Drejtuesi Politik i Partisë Socialiste për Qarkun e Elbasanit Taulant Balla nga Elbasani i është përgjigjur Gazment Bardhit lidhur me padinë që ka bërë në SPAK me pretendimin se shtabi elektoral i PS ka telefonuar qytetarët që marrin ndihmë ekonomike.
Balla gjatë një takimi që ka bërë me me qytetarët në Elbasan, ka thënë se nuk do flasë me të njëjtën gjuhë sakaq ka shtuar se pasi të dalë rezultati i zgjedhjeve, sipas tij Bardhi do kallëzojë në Prokurori për tradhëti të lartë gjithë PD e Elbasanit.
“Elbasani ka një traditë shumë të mirë të bashkëjetesës si ndërfetare dhe ndërpolitike. Unë nuk dua që t’i kthehem me të njëjtën gjuhë se mirë do ishte që unë ta padisja për shpifje në lidhje me atë që ka thënë, por unë nuk po i hy sepse nuk kam kohë për tu marë as me Gazin, as me Lulin, as me Saliun, as me Ilir Metën, me Monikën jo e jo. Por, për Gazin një gjë ua them me siguri të plotë, kur të dalë rezultati i zgjedhjeve në Elbasan, Gazi do padisë dhe do kallëzoj në prokurori për tradhti të lartë dhe për tallje me udhëheqjen të gjithë PD-në e Elbasanit. KSHQ. Behu gati PD-ja e Elbasanit se do ju kallëzojë Gazi për tradhti dhe që talleni me udhëheqen”, tha Balla.
Gazment Bardhi, tha se ka kallëzuar penalisht në SPAK rivalin e tij në këtë qark, Taulant Ballën. Bardhi tha se e ka të konfirmuar që persona nga shtabi elektoral i Ballës marrin në telefon të gjithë qytetarët me ndihmë ekonomike dhe i kërcënojnë që të votojnë për PS, ose në të kundërtën u thonë se do t’u heqin ndihmën.
