Kryetari i Partisë Demokratike, Lulzim Basha ka akuzuar drejtpërdrejt qeverinë se taksat e rritura kanë çuar biznesin në krizë. Teksa ka publikuar video-denoncimin e pronarit të një biznesi, kryedemokrati thotë se “bizneset në grahmat e fundit të mbijetesës kanë larguar mijëra punonjës”. Sipas tij zgjidhja për të shmangur humnerën është plani i PD. “Koha nuk pret!”, shkruan Lulzim Basha.
Në video shihet Roland Hoxha pronari i një biznesi ku thotë se në vitin 2018, bënte një xhiro prej 33 milionë lekësh. Sipas tij kanë qenë politikat e gabuara të qeverisë që tashmë ai është i detyruar që të paguajë taksa të larta ku së bashku me me sigurimet ai thotë se paguanrreth 6 milionë lekë. Përpos kësaj, ai thotë se duhet të paguajë edhe taksat e bashkisë, të cilat janë një barrë e shtuar për këtë biznes. Ai gjithashtu shprehet se biznesi po del me minus dhe se po e mban për mbijetesë, ndërsa fitimi as nuk mendohet.
“Jam Rolandi dhe drejtoj këtë biznes prej 12 vitesh. E di shumë mirë, njoh edhe zonën edhe vështirësitë e punës ça do të thotë të çohesh në mëngjes deri në darkë, të privohesh nga koha që do harxhosh me fëmijët me çdo gjë. Biznesi bën një xhiro rreth 33 milionë. Shteti më kaloi me TVSH që paguaja rreth 1 milionë e 200 mijë lekë, domethënë që nuk ishin planifikuar fare këto lekë e me gjithë sigurimet këto lekë mund të shkojnë 6 milionë e gjysëm. Pret edhe taksë 5% tatim-fitimi. Këtë taksë paguan edhe ai që ndërton pallatet dhe kjo nuk më duket e drejtë. Përpos kësaj, vinë edhe zarfat e bashkisë që nuk po e kuptojmë fare. 75 mijë lekë taksa arsimi a taksë uji, unë se kam marrë vesh fare, herë pas here që na kanë rënduar pa masë. Unë e di shumë mirë ça do të thotë që të dalësh me 120 mijë lekë minus edhe të mbash një biznes për të mbijetuar, jo për të fituar se harroje fitimin”.
