TIRANË- Kryedemokrati Lulzim Basha ka zbuluar se është duke negociuar me disa drejtues të Partive Popullore Evropioane si edhe komisionerin për Zgjerim Oliver Varhelyi, për t’i mundësuar edhe Shqipërisë në kohë vaksinimin. Në një bashkëbisedim me studentë në rrjetet sociale pasditen e djeshme, Basha tha se iu ka kërkuar diplomatëve në Bruksel arritjen e një marrëveshjeje që vendet që kanë porositur më shumë doza sesa nevoja, t’i sjellin tepricat në Shqipëri.
“Edhe në këtë situatë duhet të mendojmë se çfarë mund të bëjmë para t’i dalë përpara të keqes. Kjo është arsyeja pse më shumë prej dy javësh, edhe sot shkëmbeva një bisedë me Varhelyi për çështjen e vaksinës. Këtu kryeministri bëri udhëtim luksi në Nju Jork sikur po shkon të marrë domate.
PD është pjesë e PPE dhe kjo më jep mundësinë të flas me disa nga udhëheqësit e Europës dhe pjesëtar të PE me të cilët fola para dy javësh për të kërkuar të bëjnë gjithçka të ndihmojnë Shqipërinë. Ato vende që kanë bërë një porosi më të madhe se sa i duhet të kemi mundësinë ta sjellim në Shqipëri për personelin shëndetësor dhe shkallë pas shkalle të gjithë sipas protokollit të OBSH”, u shpreh Basha.
Vaksinimi në BE nis në 27 dhjetor, ndërsa për Ballkanin Perëndimor nuk ka asnjë datë se kur do të nisë vaksinimi, apo se kur do të vijnë dozat e para. Kryeministri ka deklaruar se vaksina vjen në dy muajtë e parë të 2021, por COVAX sipas raportimeve në disa media serioze evropiane, nuk ka në “plan” të sigurojë vaksinat e para Pfizer dhe Moderna para vitit 2022.
