Sot është nata e fundit e festës së Birrës në Korçë. Që në nisje të saj, u diskutua në media dhe në rrjetet online në lidhje me pjesmarrjen e këngëtarit serb Goran Bregovic. Mirëpo, Bashkia e Korçës nuk u tërhoq asnjëherë nga ideja fillestare, që këngëtari serb të ishte pjesë e saj.
Siç edhe është njoftuar nga Bashkia Korçë, Goran Bregovic do të performojë me këngën “Kosovska”, një këngë e vjetër, e kënduar nga Bijelo Dugme dhe e shkruar nga vetë këngëtari serb.
Qytetarë nga Kosova bënë thirrje për bojkot që të mos ftohej këngëtari serb mirëpo nuk ia arritën qëllimit. Tërheqja nga festivali e disa emrave më të njohur të muzikës për momentin, si Capital T, Dafina Zeqiri, grupi Ilirët, nuk solli as kjo një ndryshim në vendimin e mëparshëm të Bashkisë.
E njëjta situatë u paraqit dhe në Shqipëri. Disa kanë kërkuar bojkot e disa të tjerë kanë paralajmëruar edhe për dhunë. Situata është mjaft e tensionuar dhe mendohet se kështu do të vazhdojë edhe në mbrëmje kur Goran Bregoviç do të dalë të performojë përpara publikut shqiptar.
Ka qënë Bashkia e Korçës ajo që ka thënë se “arti dhe kultura janë ura miqësie që lidhin popujt”, por ura ka përherë dy brigje. Koha do e tregojë nëse këto përpjekje janë të dyanshme dhe nëse do të vijë momenti që dhe këngëtarët shqiptarë të mirëpriten me kaq bujë në Serbi.
