KORÇË– Ambasadori i Bashkimit Europian në Tiranë, Luigi Soreca duket se nuk ka asnjë problem me garimin e kandidatëve të zgjedhur nga ish-kryeministri Sali Berisha në zgjedhjet e pjesshme lokale të 6 marsit. Nga Korça ku ishte për një takim me fermerët së bashku me ministren e Bujqësisë, Frida Krifca, ambasadori Soreca u pyet për një koment për aktivitetin e Sali Berishës, në një kohë kur Amerika e ka shpallur “non grata”, e homologia e tij, Yuri Kim nuk e kursen në reagimet publike. Por Soreca u shfaq i distancuar, duke u shprehur se nuk dëshiron të komentojë zhvillimet e brendshme të një partie.
“Më lejoni të mos e komentojmë mbi zhvillimet e brendshme të partisë. Ndjekim parimin e mosndërhyrjes. Do të ketë zgjedhje shumë shpejt. Ne po flasim me të gjitha forcat politike. Vazhdojmë punën tonë duke biseduar me forcat politike në vend dhe sa i përket çështjes së Vettingut,”-tha ndër të tjera Soreca. Ndërkohë që kërkoi edhe konsensus nga palët politike në seancën plenare të të enjtes, për zgjatjen e mandateve të organeve të Vettingut. Sipas tij, Komisioni i Venecias e ka dhënë “ok” për procesin, duke mos konstatuar asnjë problematikë, ndaj dhe politika duhet të zgjedhë që për të gjithë magjistratët që do kalojnë në “filtër”, të kenë të njëjtin standard.
“Linja jonë është e qartë, kemi qenë të qartë që prej nëntorit të vitit të shkuar. Zgjatja e mandateve është e nevojshme. U konfirmua edhe nga Komisioni i Venecias, nuk gjetën asnjë problem për zgjatjen e afateve. Është e rëndësishme që të ruhen të njëjtat standarde për të gjithë. Votimi për zgjatjen e afateve është një votë për të ardhmen e Shqipërisë,”-tha ai ndër të tjera.
