Sot Rithemelimi ka mbledhur Këshillin Kombëtar të Partisë Demokratike, ku do të zgjidhen anëtarët e kryesisë. Emrat e 47 kandidatëve, të cilët u bënë publike një ditë më parë do t’i propozohen Këshillit Kombëtar për votim. Nga këta 47, vetëm 20 do të zgjidhen! Në rend të ditës së punimeve përveç zgjedhjes së Kryesisë së PD, do të jenë dhe pika të tjera që lidhen me organizimin dhe drejtimin e PD.
Sali Berisha në fjalën e tij në Këshillin Kombëtar ka sulmuar paraardhësin e tij në krye të kësaj partie, Lulzim Basha për drejtimin e dështuar në 8 vite të PD-së.
‘Në këtë proces ne ja dolëm, përkundrejt vështirësive të jashtëzakonshme, të jemi sot opozitë e vërtetë. Më të fuqishëm se kurrë në ekzistencën tonë të jemi më të vendosur se kurrë në misionin tonë. Sa herë që të analizosh këtë proces, të papërsëritshëm, gjen se merita absolute u takon anëtarëve dhe anëtarëve të PD-së. Dy janë sëmundjet kryesore të opozitës, e para pazaret me qeverinë për interesa personale. Ne jemi shembulli më tragjik, PD në vitet e shkuara. Drejtim betejë për interesin kombëtar. PD kaloi nga humbja në humbje për shkak të udhëheqjes së saj problematike, dështake, për shkak të pazareve të udhëheqjes së saj dhe jo për shkak të anëtarëve. Ata iu përgjigjën çdo thirrje në 8 vite, sakrifikuan dhe bënë çdo sakrificë të madhe në 8 vite. E gjitha kjo përbën një detyrim madhor për ne.’- tha Berisha.
