Avokati dhe aktivisti i njohur Adriatik Lapaj ka hedhur poshtë aludimet e Partisë Socialiste në lidhje me krimet zgjedhore të blerjes së votës. Sipas tij çdo person që sheh një Krim Zgjedhor, të tipit blerje e votës, pengim te zgjedhësit për të votuar apo përdorimi i dokumentave të të tjerëve, mund të arrestojë në flagrancë personit i cili kapet duke kryes këto veprime. Ndërkohë Partia Socialiste është shprehur se asnjë nuk ka të drejtë të ndalojë një makinë dhe ta bllokojë atë, vetës se ka dyshime se po kryejnë një krim zgjedhor.
Avokati Lapaj ka postuar edhe ligjin i cili ia lejon këtë gjë çdo individi.
Në një postim në rrjete sociale Lapaj shkruan:
“LIGJI U NJEH TË DREJTËN QYTETARËVE TË ARRESTOJNË NË FLAGRANCË VETË KËDO KRYEN NJË KRIM ZGJEDHOR Kushdo konstaton një person që kryen një krim zgjedhor duke blerë votë sipas nenit 328 “Korrupsioni aktiv në zgjedhje”, duke shitur votë sipas nenit 328/b “Korrupsioni pasiv në zgjedhje”, duke penguar zgjedhësit të votojnë sipas nenit 330 “Pengimi i zgjedhësit”, duke marrë apo përdorur dokumentat e të tjerëve sipas nenit 331/a të Kodit Penal bazuar në nenin 251 pika 1 dhe 4 të Kodit të Procedurës Penale është i AUTORIZUAR të ARRESTOJË në flagrancë shkelësin e ligjit me detyrimin për ta dorëzuar menjëherë te oficeri i policisë gjyqësore. MOS E SHIT VOTËN!”
Kujtojmë se tre ditë më parë në qytetin e Elbasanit është zhvilluar një përplasje me armë mes grupit të mbështetësve të Pjerin Xhuvanit, simpatizantë të Partisë Socialiste dhe palës së Strukturës për Mbrojtjen e Votës, të partisë Demokratike, pjesë e të cilës ishte edhe Arbër Papleka, tashmë i arrestuar, ku mbeti i vrarë Pjerin Xhuvani dhe janë plagosur 4 persona të tjerë, mes tyre dhe një efektive policie, dhëndri i viktimës dhe dy mbështetës të Partisë Demokratike, pjesë e Strukturës për Mbrojtjen e Votës.
Sipas Partisë Demokratike, Struktura për Mbrojtjen e Votës kishte evidentuar një furgon i cili po jepte para në këmbim të votës dhe e kishte neutralizuar duke e bllokuar deri në mbërritje të forcave policore, të cilat ishin lajmëruar nga PD për ngjarjen në fjalë. Por duket se situata ka precipituar në një shkëmbim zjarri, i cili nuk dihet akoma se nga cila pale ka nisur, duke përfunduar me një masakër të vërtetë.
