Lionel Messi nuk mund t’i mbante lotët, ende pa filluar të flasë në konferencën për shtyp. Bashkëshortja e tij, Antonella, e cila ishte ulur së bashku me tre djemtë e tyre në rreshtin e parë, i ofroi disa facoleta yllit të FC Barcelonës.
Emocionet nuk përshkruheshin: “Kam menduar shumë ditët e fundit se çfarë të them. Por mua thjesht nuk po më kujtohet asnjë fjalë“,- tha Messi me zë të ulët dhe të dridhur. “Ky është klubi që e dua, por ky nuk është momenti që kam pritur”.
Miliona tifozë në të gjithë botën ndoqën këto fjalë të tij në internet.
Pas përfundimit të konferencës së Messit u ngritën në këmbë të gjithë bashkëlojtarët e tij të mbledhur dhe duartrokisnin. Edhe ata ishin të mërzitur dukshëm me këtë përfundim të papritur të karrierës së Messin në FC Barcelona. Messi tha se i ishte ngrirë gjaku kur kuptoi se përfunduan pa sukses negociatat për vazhdimin e kontratës me klubin e zemrës, ku kishte ardhur se në vitin 2000, si 13-vjeçar. Por Messi nuk deshi të flasë për shkakun e dështimit të bisedimeve.
“Shumë klube janë të interesuara”, u përgjigj 34-vjeçari, në pyetjen se ku do të vazhdojë karrierën. Por edhe ai pranoi se janë duke biseduar me klubin francez Paris Saint-Germain. Gazeta “L’Équipe” shkruan madje se është e mundur që kontrata të nënshkruhet këtë të hënë. “Do të fillojë një kapitull i ri, e ky është kapitulli më i vështirë në jetën time”, tha Messi.
“Për mua është jashtëzakonisht e vështirë. Unë tërë jetën kam jetuar këtu, nuk jam i përgatitur për largim”, tha Messi. Edhe familja e tij ishte e bindur se karriera e super yllit argjentinas do të vazhdojë në Barcelonë. Messi ka ofruar që të heqë dorë nga gjysma e rrogës, por as kjo nuk ka ndihmuar.
