Ish-zëvendëskryeministri Erion Braçe ka reaguar për deklaratën e Kryeministrit Edi Rama se do përballemi me një krizë të energjisë elektrike, e cila do të rrisë çmimet në vend.
Përmes një statusi në gjatë në “Facebook”, deputeti i PS ka kundërshtuar rritjen e çmimit të energjisë që sipas tij thellon pabarazinë mes të pasurve dhe të varfërve. Ishzëvendëskryeministri ka një qëndrim të ndryshëm nga ai i Kryeministrit, i cili u shpreh se rritja e çmimit të energjisë në vendin tonë do vijë si pasojë e rritjes së çmimit edhe në tregjet ndërkombëtare.
Braçe thotë se duke thënë se tregu shqiptar kontrollohet nga një numër shumë i vogël kompanish, të cilat vendosin dhe njoftojnë çmimet pa iu nënshtruar konkurrencës, pasi, siç argumenton ai, çmimet në tregun tonë as funksionojnë si në bursë dhe as përcillen siç vendos bursa.
Sipas deputetit të PS-së, ndryshe nga pandemia dhe tërmeti, kriza e çmimeve, sado e përkohshme të jetë, nuk duhet të pasurojë edhe më të pasurit, por të përballohet prej tyre. Ndonëse shprehet se çmimet do jetë e pamundur t’i ndalim, Braçe thotë se ai që duhet ta ndalim është abuzimi, ndërsa apelon që qeveria të ndërhyjë për të rikthyer konkurrencën në treg dhe të rishpërndajë fondet për familjet në vështirësi ekonomike.
POSTIMI I PLOTË:
Çmimet nuk godasin të pasurit! Çmimet copëtojnë të varfrit! Çmimet shtyjnë për poshtë, në varfëri, shtresën e mesme! Çmimet thellojnë pabarazinë, polarizojnë shoqërinë! Këtë duhet të ndalim! Çmimet do jetë e pamundur t’i ndalim. Por ai që duhet ta ndalim është abuzimi! Tregjet tona janë të përqendruara, të kontrolluara nga vetëm 4- 5 kompani, thuajse me konkurrencë formale; Çmimet në to as funksionojnë si në bursë dhe as përcillen siç bursa vendos;
Çmimet këtu nuk i nënshtrohen konkurrencës; çmimet këtu caktohen, njoftohen. Nëse duam të ndalojmë thellimin e pabarazisë, duhet të rikthejmë konkurrencën në tregjet kyç. E dyta duhet të rishpërndajmë; Rritja e çmimeve pa ndryshuar tatimet e taksat, po sjell të ardhura shtesë në arkën e shtetit, shumica paguar nga qytetarët për shkak të TVSH, akcizës, tatime e taksa konsumi; Dua ta sqaroj njëherë e mirë, i paguajnë qytetarët, biznesi i madh bën thjesht agjentin e qeverisë. Ndaj duhet të rishpërndajmë. Dy rrugë ka: përmes tatimeve e taksave, veçanërisht atyre që mbitatojnë konsumin, të ardhurat nga puna, uljes së tyre; përmes pagesave të drejtpërdrejta, mbrojtëse e rimbursuese për të varfrit dhe shtresën e mesme.
Të paktën, këtë herë barra e krizës nuk mund të përballohet nga të varfrit e të mesmit; tërmetin e pandeminë e paguan plotësisht ata; kriza e çmimeve, sado e përkohshme të jetë, nuk duhet të pasurojë edhe më të pasurit, por të përballohet prej tyre. Pa shtuar asnjë tatim për ta, por duke i bërë të paguajnë ndershmërisht atë që u takon, atë që e fshehin dhe që i ka mbipasuruar! Janë 100 vip-at tanë! Në Kuvend ,javën e dytë të shtatorit ua thashë me emra e mbiemra, xhiro, fitim qesharak dhe tatim akoma dhe më qesharak të paguar.
VOA: Dje Presidenti i SHBA, BIDEN, postoi videon; javën që shkoi Shtëpia e Bardhë publikoi një raport për nivelin e tatimeve të paguara nga 400 familjet më të pasura të Amerikës, jashtëzakonisht i ulët krahasuar me nivelin e tatimeve të punëtorëve. E di, edhe unë ashtu e mendoj, njësoj kudo. Por ka një dallim. Në SHBA për pabarazinë, padrejtësinë në pagesën e tatimeve, heton, analizon, gjykon, bën transparencë qeveria, flet ai që e drejton, Presidenti Biden.
