Tiranë- Dy ministrat e rinj të kabinetit qeveritar, Bledi Çuçi dhe Milva Ekonomi u betuan sot në Presidencë.
Pas ekzekutimit të himnit kombëtar, ministri Çuçi dhe ministrja Ekonomi u betuan me dorën mbi Kushtetutë para Presidentit të Republikës, Ilir Meta: “Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të anëtarit të Këshillit të Ministrave”.
Kreu i Shtetit u dorëzoi dekretet përkatëse të emërimit Ministrit të Brendshëm Çuçi dhe Ministres së Bujqësisë dhe Zhvillimit Rural Ekonomi, duke u uruar suksese në detyrat e tyre të reja e të rëndësishme. Ministri i Brendshëm dhe ministrja e Bujqësisë, të shoqëruar nga Engjell Agaçi, sekretari përgjithshëm i Kryeministrisë mbërritën në Presidencë, ku u mbajt ceremonia e betimit, sipas protokollit.
