Tiranë- Ditën e sotme është mbajtur komisioni parlamentar i Veprimtarisë Prodhuese. Anëtarët e komisionit diskutuan mbi problematikat aktuale dhe deri në zgjidhjen e tyre mes anëtarëve të komisionit mbi veprimtarinë prodhuese.
Deputeti, Vullnet Sinaj ishte pjesë e diskutimit ku paraqiti iniciativën e marrë prej tij për zgjidhjen e një problemi i vërejtur gjatë ushtrimit të aktivitetit minerar në Selenicë. Deputeti Sinaj theksoi se herë pas here lindin konflikte të ndezura mes pronarëve të tokave që përfshihen në zonat minerare dhe subjekteve që ushtrojnë aktivitete në këto zona.
Deputeti Sinaj propozoi ndryshimin në ligj ku për zotëruesit e lejes minerare, të lidhin aktmarrëveshje me pronarët e tokave që dëmtojnë, ose ndryshe leja të revokohet.
“Diskutim i frytshëm sot në komisionin parlamentar të Veprimtarisë Prodhuese, mbi iniciativën që kam paraqitur për zgjidhjen e një problemi që është vërejtur gjatë ushtrimit të aktivitetit minerar në Selenicë. Siç dihet, herë pas here lindin konflikte të ndezura mes pronarëve të tokave që përfshihen në zonat minerare dhe subjekteve që ushtrojnë aktivitet në këto zona. Sipas ligjit aktual, zotëruesit e lejes minerare duhet të lidhin aktmarrëveshje me pronarët për shfrytëzimin e tokave, ku parashikohen kushtet dhe pagesa për dëmet.
Në praktikë, ndodh që sipërmarrësit nuk lidhin aktmarrëveshje duke dëmtuar pronën private dhe duke mos paguar dëmet. Në respekt të të drejtës kushtetuese të pronës, kam paraqitur amendamentin përkatës që i detyron sipërmarrjet të lidhin aktmarrëveshje me pronarët e tokave që dëmtojnë, ose ndryshe leja do të revokohet. Sot patëm një diskutim në parim në komision, falenderoj kolegët për mendimet e tyre. Diskutimi nen për nen vijon javën e ardhshme. Për më shumë, ju ftoj të ndiqni videon e mbledhjes së komisionit parlamentar të Veprimtarisë Prodhuese.”
