Megjithëse Rama dhe ministri i Jashtëm grek u shprehën që për çështjen e detit bien dakord ta çojnë në gjykatën e Hagës, ajo që mbetet e paqartë është se çfarë do të çojnë konkretisht: kufirin detar apo shelfin kontinental.
Kjo është “thembra e akilit” të çështjes sepse Greqia mund të kërkojë të shqyrtohet kufiri detar, por ndërkohë kufijtë detarë të Shqipërisë dhe Greqisë janë vendosur me protokollin e Firences që në vitin 1926.
Edhe vendimi i Gjykatës Kushtetuese e ndalon shtetin shqiptar të vendosë në diskutim kufijtë e vendit. Çështja mund të shkojë për shelfin kontinental, pra nëntokën e detit, përtej detit territorial.
Në çdo rast, ky qëndrim duket më shumë një përpjekje për të marrë kohë nga Edi Rama deri në zgjedhjet e ardhshme. Rama nuk do ta ketë kundër faktorin grek në zgjedhje, ndaj ka bërë këtë lëshim, për ta çuar në drejtësinë ndërkombëtare. Përgatitja e dosjes do të kërkonte 1 deri në 2 vite dhe kjo nuk ka gjasa të ndodhë para zgjedhjeve.
Në takimet e tjera që pati Nikos Dendias në Tiranë, Lulzim Basha u shpreh dakord për zgjidhje në gjykatë ndërkombëtare.
Kurse Ilir Meta nuk e përmendi këtë, por tha se duhet zbatuar vendimi i Gjykatës Kushtetuese, pra mbajti një qëndrim më të ngurtë. Ilir Meta, njoftoi se për çështjen e delimitimit të hapësirës detare ndërmjet dy vendeve, gjatë takimit me ministrin grek ka inkurajuar që kjo temë “të trajtohet përmes një dialogu të sinqertë dhe respekti reciprok, duke synuar një zgjidhje të përhershme dhe të qëndrueshme. Marrëveshja për këtë çështje të rëndësishme duhet të jetë në përputhje me Konventën e Kombeve të Bashkuara mbi Ligjin e Detit, me legjislacionin e të dy vendeve dhe Vendimin e Gjykatës Kushtetuese të Republikës së Shqipërisë”.
Vizita e Dendias u shoqërua me protesta para ministrisë së Jashtme nga ana e Vetëvendosjes dhe komunitetit çam të PDIU. Nga ana e tij, ministri grek premtoi heqjen e ligjit të luftës, por këtë premtim kanë 30 vite që e bëjnë dhe me gjasë edhe ai bëhet thjesht për të dhënë imazhin që marrëdhëniet mes dy vendeve janë të mira dhe vizita në Tiranë nuk dështoi, por pati sukses./ Alba News.al
