TIRANË– Klodian Rasha, vetëm 25 vjeç është përcjellë sot për në banesën e fundit pasi u vra nga Policia e Shtetit ditën e djeshme. Familja e tij ka hapur dyert e mortit duke pritur personat e fundit që i kanë bërë nderimet të riut të vrarë mesnatën e djeshme nga efektivi Nevaldo Hadëraj. Në shtëpi kanë shkuar shokët e Klodjan Rashës, të cilët kanë hedhur poshtë versionin e Policisë së Shtetit se i riu kishte armë me vete. Njëzëri ata janë shprehur se i riu i urrente ato dhe se kishte dalë nga shtëpia vetëm për të blerë cigare dhe për të takuar miqtë e tij. Në banesën e familjes ka shkuar edhe deputeti Halti Valteri që ka kërkuar dorëheqjen e ministrit të Brendshëm, Sandër Lleshaj dhe kryepolicit Ardi Veliu.
Ndërkohë që sipas burimeve, në momentin kur Rasha është qëlluar nga efektivi i forcave “Shqiponja” nuk ka pasur armë me vete. Të njëjtat burime bëjnë me dije gjithashtu se i riu nuk ka shkuar kurrë me shenja jetë në spital, pasi plumbi i marrë në kokë e kishte lënë të vdekur në vend. Ndërsa arma u gjet 100 metër larg vendit ku u qëllua Rasha. Ajo është dërguar në laboratorin e kriminalistikës ku do i bëhet ekspertiza nëse ka gjurme gishtërinjsh apo jo të 25-vjeçarit Klodian Rasha.Efektivi Hadëraj është marrë sërish në pyetje për të parë nëse ka çedim në historinë e tij, por ka përsëritur të njëjtën dëshmi, duke theksuar se e kishte bërë gjithçka për vetëmbrojtje.
Opinioni publik është “ngritur në këmbë” pas vrasjes së tij dhe ditën e sotme janë organizuar dy protesta. Njëra po zhvillohet tani nga të rinjtë e Partisë Demokratike, ndrësa tjetra do të zhvillohet në orën 16:00 të pasdites. Ndërkohë që ngjarja ka tronditur të gjithë, ende nuk ka një reagim nga qeveria dhe as nga presidenti i vendit, Ilir Meta.
Ngjarja e rëndë ndodhi ditën e djeshme në kryeqytet ku 25-vjeçari u vra gjatë natës nga një efektiv policie. Gjithçka ka ndodhur në zonën e Laprakës, në rrugën “Dritan Hoxha” rreth orës 1:45 të mëngjesit, ndërsa efektivi Nevaldo Hadëraj është prangosur 12 orë më pas. Pas pas mesnatë, patrulla e Policisë ka pikasur një të ri, i identifikuar si Klodian Rasha, që po kryente veprime të dyshimta. Efektivët i kanë bërë thirrje për të ndaluar që në zonën e Don Boskos, por ai është frikësuar dhe ka vendosur që të largohet me vrap. Në një moment, në ndjekje e sipër dhe vetëm 100 metra larg banesës së tij, i riu është kthyer nga efektivët që po e ndiqnin dhe u ka drejtuar një objekt që në dukje ngjante me një armë zjarri.
