BULQIZE- Policia e Shtetit ka mohuar denoncimin e bërë nga Partia Demokratike se një i ri është rrahur në komisariatin e Bulqizës. Në një njoftim për mediat, PSh bën me dije se ngjarja ka ndodhur më 17 dhjetor 2020, ku i riu R.P., 29 vjeç është ndaluar për verifikim nga Policia. Sipas Policisë, ai ndodhej bashkë me dy persona të tjerë dhe nuk kanë patur me vete asnjë mjet identifikimi, e për rrjedhojë, efektivët i kanë shooqëruar në Komisariat. Por gjatë shoqërimit, R.P, ka qëlluar punonjësit e Policisë, duke dëmtuar fizikisht njërin prej tyre.
NJOFTIMI I POLICISË:
Në lidhje me një lajm të publikuar në rrjetet sociale ku pretendohet se është ushtruar dhunë nga Policia ndaj një shtetasi që ndodhet i shoqëruar në Komisariatin e Policisë Bulqizë, sqarojmë opinionin publik se : Shërbimet e Komisariatit të Policisë Bulqizë, në orët e mbrëmjes të datës 17.12.2020, kanë ngritur një pikë kontrolli dhe kanë ndaluar për verifikim një automjet ku udhëtonin tre shtetas, të cilët nuk dispononin mjete identifikimi me vete dhe për këtë arsye është bërë shoqërimi i tyre në Komisariatin e Policisë. Shtetasi R. P., gjatë momentit të shoqërimit ka kanosur e kundërshtuar me dhunë punonjësit e policisë si dhe i ka shkaktuar dëmtime fizike njërit prej tyre.
Në përfundim të veprimeve të para hetimore specialistët për Hetimin e Krimit në Komisariatin e Policisë Bulqizë bënë arrestimin në flagrancë të shtetasit:
R. P., 29 vjeç, banues në Bulqizë (person me precedent të mëparshëm penal në fushën e vjedhjes), për veprat penale “Kundërshtimi i punonjësit të policisë së rendit publik”, “Goditje për shkak të detyrës”, “Kanosje për shkak të detyrës”. Në lidhje me pretendimin se është ushtruar dhunë sqarojmë opinionin publik se në asnjë moment nuk është ushtruar dhunë nga punonjësit e policisë ndaj personit të arrestuar.
Dega e PD në Bulqizë denoncoi dje rastin e një dhune sipas demokratëve nga Policia tek një i ri. Në pamjet shihej një i ri i cili ka dëmtime në fytyrë, e ndërkohë PD-ja deklaroi se dy të rinjtë janë shoqëruar pa asnjë motiv nga efektivët e policisë dhe janë rrahur barbarisht prej tyre.
